Ўзбекистон президенти Шавкат Мирзиёев 2025 йил 7 май куни ўтказилган йиғилишда мамлакатдаги тиббий хизматлар сифатини танқид қилди. Бу ҳақда давлат раҳбари матбуот хизмати хабар берди.
Шавкат Мирзиёев сўнгги етти йилда давлат бюджетидан тиббиётга ажратилаётган маблағлар 6 баробарга ошиб, жорий йилда 42 триллион сўмга етганини маълум қилди.
Бирламчи тиббий-санитария ёрдами бўғинини ихтисослаштирилган хизматлар билан боғлаган комплекс тизим яратилди. Вилоятлар ва туманларда илгари фақат Тошкентда амалга оширилган юқори технологик операциялар бажарила бошланди. Президентнинг таъкидлашича, ҳар куни иккитадан буйрак кўчириб ўтказиш операцияси амалга оширилмоқда.
Унинг сўзларига кўра, мамлакатда ҳар 10 минг аҳолига 27 нафар шифокор тўғри келади – бу кўрсаткич АҚШ, Буюк Британия ва Финляндиядаги каби ва Туркия ва Канададагидан 1,5 баробар кўпдир.
«Кўриб турганингиздек, бизда тиббиёт ходимлари сони ҳам, молиялаштириш билан ҳам муаммо йўқ. Аммо сифат нима бўлади? Бу борада жуда кўп жиддий саволлар бор», — деди Шавкат Мирзиёев.
«Тез ёрдам поликлиникага айланиб қолди»
Президентнинг маълум қилишича, Ўзбекистонда ноинфекцион касалликлардан кўриладиган зарар ҳар йили 1 миллиард АҚШ долларини ташкил этади.
Унинг сўзларига кўра, тез ёрдам хизматига ҳар тўртинчи чақирув сурункали касалликларга чалинган одамларга тўғри келмоқда.
Фарғона вилоятининг 12 та маҳалласида ўтказилган ўрганиш шуни кўрсатдики, 10 нафар бемордан 8 нафари оилавий шифокор билан боғланмасдан, касалхона ёки хусусий клиникага мурожаат қилмоқда. Хоразмда эса беморлар оилавий шифокордан кўра тез ёрдамни афзал кўришади. «Тез ёрдам поликлиникага айланиб қолди», — деди президент.
Андижон ва Наманган вилоятларида, шунингдек Самарқанд шаҳрида поликлиника шифокорлари кунига 50-60 нафар беморни қабул қилмоқда. Шавкат Мирзиёевнинг таъкидлашича, бу ҳеч қандай стандартларга тўғри келмайди.
Унинг сўзларига кўра, Бухоро вилоятида оилавий шифокорлар профилактика, скрининг ва даволаш ўрнига беморларни касалхоналарга йўналтирувчи «диспетчер» вазифасини бажармоқда. Президент бу масалалар ҳақида соғлиқни сақлаш соҳасининг масъул шахслари ҳам, ҳокимлар ҳам ўйламаяпти, деди.
У вилоят ва туман касалхоналарида шифокорлар, ўринлар ва маблағларни тўғри тақсимлаш соҳасидаги камчиликларга ишора қилди.
Касалланиш даражаси юқори бўлган Сурхондарё ва Қашқадарёда ҳар 10 минг аҳолига 25 та шифохона ўрни тўғри келади, Навоийда – 31 та, Сирдарё вилоятида – 34 та.
Аҳолиси бир хил бўлган Қўрғонтепа ва Наманган туманларида мос равишда 310 ва 420 та шифохона ўрни мавжуд. Натижада биринчи туманда дори-дармонларга ажратилган маблағлар бир кишига 3500 сўмни, иккинчисида эса 16 минг сўмни ташкил этади.
Андижон шаҳридаги давлат касалхонасида давлат бюджетидан молиялаштириладиган ҳар 10 та ўринга 28 нафар тиббиёт ходими тўғри келса, хусусий клиникада эса атиги 5 нафар, дея хабар берди президент.
