Ўзбекистонлик боксчи ва олимпия чемпиони Лазизбек Муллажонов допинг-тестнинг ижобий натижаси туфайли 3 йил мусобақаларда иштирок этишдан четлатилди. Бу ҳақда World Boxing федерациясининг мустақил антидопинг дастури учун масъул бўлган Халқаро тест агентлиги (ITA) хабар берди.
Ташкилот маълумотларига кўра, спортчининг мусобақадан ташқари олинган намунаси метастерон метаболитларига ижобий натижа берганидан сўнг дисквалификацияга рози бўлган. Бу мушакларнинг тез ўсишига, куч ва чидамлиликни оширишга ёрдам берувчи синтетик анаболик андроген стероид. У мусобақа пайтида ҳам, ундан ташқари пайтда ҳам тақиқланган.
Намуна жорий йил 2025 йил 11 июнь куни мусобақадан ташқари допинг-назорати доирасида олинган. Июль ойи охирида Муллажонов вақтинча дисквалификация қилинган эди.
ITA боксчи қоидабузарликка эътироз билдирмаганини маълум қилди. World Boxing’нинг антидопинг қоидаларига мувофиқ, унинг тан олиши 4 йиллик стандарт четлатиш муддатини бир йилга қисқартиришга имкон берди. Шу тариқа, дисквалификация даври 2025 йил 22 июлдан 2028 йил 21 июлгача белгиланди.
Спортчининг 2025 йил 11 июнь (намуна топширилган сана) дан 2025 йил 22 июлгача (вақтинча четлатилган сана) бўлган даврдаги натижалари бекор қилинди.
Эслатиб ўтамиз, 2025 йил август ойи бошида Ўзбекистон Бокс федерацияси ижобий допинг-тест соч кўчириш операциясидан кейин тайинланган тиббий препаратлар билан боғлиқ бўлиши мумкинлигини айтган эди.
Лазизбек Муллажонов — Париждаги 2024 йилги Олимпия ўйинларининг 92 кг гача вазн тоифасида ғолиби. У, шунингдек, ҳарбийлар ўртасида 2021 йилги жаҳон чемпиони ҳисобланади. 2022 йилда Иорданиядаги қитъа чемпионатида ўта оғир вазн тоифасида олтин медални қўлга киритган. Тошкентдаги 2023 йилги жаҳон чемпионатининг бронза медали совриндори.
Аввалроқ таэквондочи Улуғбек Рашитов жойлашган ери тўғрисидаги маълумотларни тақдим этиш шартларига риоя қилмаганлиги билан боғлиқ антидопинг қоидаларини бузгани учун икки йилга дисквалификация қилинган эди.