Ўзбекистон Президенти 2025 йил 11 декабрь куни ахборот ва рақамли технологиялар соҳаларида давлат назорати тизимини такомиллаштириш тўғрисидаги қарорни имзолади, деб хабар берди Адлия вазирлиги матбуот хизмати.
Ҳужжатга мувофиқ, Рақамли технологиялар вазирлиги ҳузуридаги Ахборотлаштириш ва телекоммуникациялар соҳасида назорат бўйича инспекцияси («Ўзкомназорат») қуйидаги йўналишларда махсус ваколатли давлат органи этиб белгиланди:
- ахборотлаштириш, телекоммуникациялар, почта алоқаси ва рақамли технологиялар соҳаларида давлат назорати;
- оммавий ахборот воситаларини рўйхатдан ўтказиш, шунингдек, улар томонидан қонунчилик талабларига риоя этилишини мониторинг қилиш ва назорат қилиш;
- болаларни уларнинг саломатлигига зарар етказувчи маълумотлардан ҳимоя қилиш.
2027 йил 1 январгача аҳоли яшайдиган жойларда, шу жумладан, чекка ва бориш қийин бўлган ҳудудларда рақамли технологиялар ва телекоммуникациялар соҳасидаги хизматлар сифатини мониторинг қилиш учун мўлжалланган «Рақамли назорат» платформасини ишга тушириш режалаштирилган.
Платформа ахборот тизимлари, ресурслар, дастурий маҳсулотлар ва маълумотлар базаларида узилишлар ёки иш тўхташи юзага келганда зарур чоралар кўрилишини ҳам таъминлайди. Шунингдек, у жисмоний ва юридик шахсларнинг мурожаатларини қабул қилади.
Эслатиб ўтамиз, 2025 йил июль ойида Президент фармони билан Президент Администрацияси ҳузуридаги Ахборот ва оммавий коммуникациялар агентлиги (АОКА) тугатилган эди. Унинг ахборот соҳасидаги назорат ва мониторинг функциялари «Ўзкомназорат»га ўтказилган.