Тошкентда ҳуқуқ-тартибот идоралари иккита йирик фирибгарлик колл-маркази фаолиятига чек қўйди, деб хабар берди ИИВ матбуот хизмати. Тергов маълумотларига кўра, ушбу колл-марказлар ходимлари Европа ва Шимолий Америка фуқароларини сохта инвестиция ва криптолойиҳаларга сармоя киритишни таклиф қилиб алдаб келишган. Операция Ички ишлар вазирлиги, Кибержиноятларга қарши курашиш департаменти ва Давлат хавфсизлик хизмати томонидан ўтказилди.
ИИВ маълумотларига кўра, фирибгарлик тармоғи Тошкентдаги 2 та бизнес-марказда фаолият юритган. Яшнобод туманида жойлашган колл-марказлардан бирида 97 киши, жумладан беш нафар чет эл фуқароси ишлаган.
Яккасарой туманида аниқланган иккинчисида эса 34 киши ишлаган бўлиб, улардан уч нафари ҳам хорижликлар.
Тергов маълумотларига кўра, «операторлар» Канада, Буюк Британия, Германия, Норвегия, Нидерландия, Дания ва бошқа мамлакатлар аҳолисига сохта телефон рақамларидан қўнғироқ қилиб, ўзларини трейдер деб таништирган ва криптоактивларни гўёки юқори даромадли инвестиция лойиҳаларига ўтказишга ишонтирган.
Колл-марказларда ишлаш учун хорижий тилларни мукаммал биладиган ёшлар, жумладан нуфузли университетлар талабалари жалб қилинган. Колл-марказ ходимларига қатъий конспирацияга риоя қилиш ва тўқима исмлардан фойдаланиш ўргатилган. Колл-марказ биноларига кириш қўриқланган, дейилади ИИВ видеосида. Тинтувлар чоғида ҳуқуқ-тартибот идоралари ходимлари 136 та компьютер, 90 та монитор, 73 та тизим блоки, 53 та моноблок, 320 та мобил телефон, 128 та қаттиқ диск, 175 та маълумот сақлаш қурилмаси, 2 та сейф ва тергов фикрига кўра, жиноят содир этишда фойдаланилган бошқа ускуналарни олиб қўйишди.
Кибержиноятларга қарши курашиш департаментининг Тергов бошқармаси жиноят иши қўзғатди. Тергов схема ташкилотчиси сифатида чет эл фуқаросини ҳисоблайди, у гўёки 1978 йилда туғилган Ўзбекистон фуқароси билан биргаликда ҳаракат қилган.
Жиноий гуруҳнинг тахмин қилинган раҳбарлари, ишнинг яна 8 нафар асосий иштирокчиси, шунингдек, 10 нафар гумонланувчи ҳибсга олинган. Қолган 111 кишига нисбатан тергов ва тезкор-қидирув тадбирлари давом этмоқда. Тергов доирасида ҳамкорлик қилиш учун ИИВ Интерпол Миллий марказий бюроси орқали Европа ва Шимолий Америка мамлакатларига сўровлар тайёрламоқда.