Ўзбекистоннинг 17 ёшгача бўлган ёшлар терма жамоасининг собиқ мураббийи Ислом Исмоилов Фарғонанинг «Нефтчи» футбол клуби бош мураббийи этиб тайинланди. Бу ҳақда жамоага эгалик қилувчи Фарғона вилояти ҳокимлиги хабар берди.
Мутахассис олдига чемпионлик унвонини сақлаб қолиш вазифаси қўйилди — жамоа бу мавсумда Ўзбекистон чемпионатининг муддатидан олдин ғолиби бўлиб, 24 йил ичида илк бор чемпионликни қўлга киритди. Исмоилов шунингдек, Осиё Футбол Конфедерацияси (ОФК) Чемпионлар лигасида муваффақиятли иштирок этиши ҳамда жамоанинг рақобатбардошлиги ва барқарор ривожланишини таъминлаши керак.
2022 йил июль ойидан жамоани бошқариб келган собиқ бош мураббий Виталий Левченко билан шартнома узайтирилмади. У 2025 йилда Суперлиганинг энг яхши мураббийи деб топилган эди.
Ислом Исмоилов ким?
2020 йилда Ислом Исмоилов Фарғонанинг Яйпан шаҳридан бўлган «Турон» футбол клубини Про-лигада (Ўзбекистон чемпионатининг иккинчи дивизиони) ғалаба қозонишга олиб келди ва ҳал қилувчи ўйинда Фарғонанинг «Нефтчи» клубини мағлуб этиб, жамоани илк бор Суперлигага олиб чиққан эди. Ўшанда ўйин футболчилар ва мухлислар иштирокидаги тартибсизликлар билан якунланган эди.
Исмоиловнинг Ўзбекистон чемпионати олий дивизионидаги фаолияти муваффақиятсиз кечди. Дастлабки икки ўйинда «Турон» мағлубиятга учради. «Сўғдиёна» билан учрашувдан сўнг Исмоилов футболдаги коррупция ҳақида гапириб, жамоаси дарвозасига баҳсли пенальти белгилаган ҳакамни танқид қилган эди.
2021 йил май ойида Исмоилов Суперлиганинг саккизинчи турида «Қизилқум»дан мағлубиятга учраганидан сўнг (0:1) истеъфога чиқди.
Кейинчалик клуб яна Про-лигага тушиб кетди, шундан сўнг унинг фаолияти тўхтатилди. 2025 йилнинг март ойида жамоа ўз фаолиятини қайта тиклади ва клуб академиясига эътибор қаратиши ҳамда ёш ўйинчиларни тайёрлашини маълум қилди.
2025 йилда Ислом Исмоилов Ўзбекистон U-17 терма жамоасини Осиё чемпиони унвонига олиб келди ва жамоани Жаҳон чемпионатининг 1/8 финалига олиб чиқди, у ерда жамоа Италияга ютқазди (1:2).
