2025 йил 8 октябрь куни Бойсун туманининг Бошработ маҳалласида жойлашган кўмир омборида кўмир тарқатиш вақтида бир-бири билан тортишиб, жанжаллашган бойсунликлар акс этган видеолавҳалар тарқалди.
Kun.uz хабарига кўра, видеодаги тартибсизликка кўмирнинг ўз вақтида етказиб берилмаслиги сабаб бўлган.
Бойсун тумани ҳокимлиги ушбу ҳолат юзасидан муносабат билдириб, тартибсизлик кўмир тарқатиш графигига риоя қилмаган айрим фуқароларнинг навбатсиз кўмир олишга уриниши оқибатида келиб чиққанини таъкидлади.
Ҳокимлик берган расмий маълумотда айтилишича, «Омборга аҳолига куз-қиш мавсуми учун тарқатиш мақсадида 278 тонна кўмир келтирилган. Давлат томонидан арзон нархларда тарқатилаётган кўмир ҳақидаги эълонлар тумандаги маҳаллаларнинг Telegram гуруҳларига жойланган».
Юзага келган тартибсизлик ўша куни ички ишлар органлари ходимлари ёрдамида бартараф этилган. Кўмир тарқатиш жараёни белгиланган тартибда қайта йўлга қўйилган. Бундан кейин кўмир қатъий белгиланган график асосида, ҳуқуқни муҳофаза қилувчи органлар ходимлари жалб этилган ҳолда, тартиб билан тарқатилиши белгиланган.
Бойсун туман ҳокимлигининг туман ИИБ маълумотига кўра, кўмир олишда бир-бирини белкурак билан калтаклаган фуқаролар акс этган видео тасвирлар бир йил аввалги ҳолат бўлиб, уларга нисбатан чора кўрилган. Қандай чора кўрилгани эса номаълумлигича қолмоқда.
Шунга қарамай, иккала видео ҳам бир вақтда тасвирга олинганига кўмир ташиш учун келган юк машиналарининг бир хил навбатда турганини таққослаш орқали ишониш мумкин.
Бойсунда куз-қиш мавсумида 39 та маҳалланинг 30 тасига кўмир тарқатилади, қолган маҳаллалар табиий ва суюлтирилган газ билан таъминланган. 2025–2026 йиллар мавсуми давомида Бойсун туманига жами 3036 тонна кўмир келтириш режалаштирилган. Ҳозирга қадар аҳолига 1325 тонна кўмир етказилган.
Тармоқларда тарқалган видеолар остида фойдаланувчилар тартибсизликка одамлар эмас, кўмирнинг ўз вақтида етказилмаётгани ва унинг қишда етишмаслиги сабаб эканлигини ёзиб қолдиришган.
Ҳозирда Бойсунда «Ангрен» кўмири эркин нархда 309 сўмдан сотилмоқда. Туманнинг ўзида ҳам бир нечта кўмир конлари мавжуд.
Ҳокимлик матбуот хизмати раҳбари Юнус Холиёровнинг сўзларига кўра, «Бу ердан қазиб олинаётган кўмирни ёқиб бўлмайди, соғлиқ учун зарарли, калорияси кучлилиги сабаб печкани ҳам эритиб юборади. Шунинг учун у қайта ишланади, худди Ангрен ва Навоий кўмири каби».
