Тошкентнинг янги «Янги Тошкент» халқаро аэропорти қурилиши ҳудудига тушадиган Ўрта Чирчиқ туманидаги «Халқобод» ва «Янгийўл» маҳаллалари аҳолиси, уйлари ва ерлари учун адолатли компенсация олади. Бу ҳақда туман ҳокими Ихтиёр Қосимов маълум қилди.
Ҳокимият «Янги Ўзбекистоннинг Олтин дарвозаси» деб атаётган лойиҳанинг амалга оширилиши «ҳудуднинг иқтисодий ва ижтимоий ривожланиши учун кучли рағбат» бўлиши хабар қилинган.
Туман ҳокими Ихтиёр Қосимов «Халқобод» маҳалласи аҳолиси ва бўлажак ҳаво дарвозаси ҳудудида жойлашган фермер хўжаликлари раҳбарлари билан учрашув ўтказди. У фуқароларнинг уй-жойлари ва фермер хўжаликлари ҳудудидаги бинолар учун компенсация тўлаш тартиби ва шартларини тушунтирди.
«Сизга яхши нарх таклиф қилиш учун келдик»
Туман маъмурияти раҳбари мулкни баҳолаш жараёни шаффоф ва маҳаллий ҳокимият аралашувисиз ўтказилишига ишонтирди.
«Биз бу ерга ҳаммасини тушунтириш ва яхши нарх таклиф қилиш учун келдик. Баҳолашга аралашмаймиз. Ҳеч ким: «Бу уйнинг нархини пасайтир», ёки «арзонроқ баҳола» демайди. Мен сизга бунга ваъда бераман. Баҳоловчи келади, у ҳақиқий, адолатли, тўғри қийматни беради», — деди Қосимов.
Унинг сўзларига кўра, уйлар ва иморатлар мустақил мутахассислар томонидан баҳоланади ва аҳоли розиликни имзолашдан олдин ҳужжатлар билан танишишлари мумкин бўлади.
«Баҳоловчилар келганида, сиз сумма кўрсатилган ҳужжатни кўрасиз. Сиз «Мен розиман» деб имзолаганингиздан сўнг, биз компенсация тўлаш тартибини бошлаймиз», — дея қайд этди ҳоким.
У барча оилалар олдингисидан ёмон бўлмаган уй-жой олишларини ва ҳеч бир уй ҳақиқий қийматидан паст баҳоланмаслигини таъкидлади.
«Мен сизларга ҳозирги уйингиздан ёмон бўлмаган уй-жой олишингизга кафолат бераман. Ҳеч бирингиз зарар кўрмайсиз. Биз сизларга олдингисидан яхшироқ уй-жой олишингизга кафолат берамиз», — деди Қосимов.
Учрашув давомида аҳоли ўз маҳалласидан янги ер участкалари сотиб олишлари мумкинми, деб сўради.
«Мен аллақачон айтдим — фарқи йўқ. Изланг мос вариантни, агар имкони бўлса», — дея жавоб берди ҳоким.
Баъзи иштирокчилар уй-жой қуриш учун ерни аукцион орқали сотиб олиш мумкинми, деб қизиқдилар.
«Ҳозирда Ўрта Чирчиқ туманида уй-жой қурилиши учун аукционга қўйилган ерлар йўқ. Ким ўйлабди дейсиз, айнан бизнинг туманимизнинг «Халқобод» ва «Янгийўл» маҳаллаларида Марказий Осиёдаги ягона халқаро аэропорт пайдо бўлади деб? Биз Президентдан миннатдормиз — у кадастри бўлмаганлар учун акция ўтказди ва бу ерда кўп йиллар расмий ҳужжатларсиз яшаб келган оилаларга кадастр ҳужжатларини расмийлаштиришга рухсат берди», — деди Қосимов.
Ҳоким фермер ерлари олиб қўйилгандан сўнг улар аукционга қўйилиши ва маҳаллий аҳоли қонуний асосда участкалар сотиб олишлари мумкинлигини маълум қилди.
Ихтиёр Қосимов алоҳида фермерларга мурожаат қилиб, олиб қўйилаётган ерлардаги барча дарахтлар ва иморатлар баҳоланиши ва тўлиқ қопланишини таъкидлади.
«Фермерлар, яхшилаб эшитинг: агар ерингизда мол-мулк — дарахтлар бўлса — бу сизнинг мулкингиз ва ҳаммаси тўлиқ қопланади. Участкадан ташқаридаги нарсалар учун компенсация тўланмайди. Ҳосилни, экинларни — бемалол йиғиштириб олишингиз мумкин, ҳеч ким сизни шошилтирмайди», — деди.
Ҳоким ёш, ҳали мева бермаган дарахтлар ҳам компенсация ҳисоб-китобида инобатга олинишини қўшимча қилди.
«Дарахтларнинг ўз мева бериш муддати бор — сиз буни биздан яхшироқ биласиз. Бу омилларнинг барчаси инобатга олинади ва давлат компенсацияни тўлиқ ҳажмда тўлайди», — деди.
Учрашув якунида Қосимов ҳеч бир оила норози ёки эътибордан четда қолмаслигига ишонч билдирди.
«Мен ҳеч бир уй эгаси ранжимаслигига кафолат бераман. Агар кимдадир савол қолса — тўғридан-тўғри менга мурожаат қилинг. Мен ўзим сизнинг олдингизга келишга ёки сизни ҳокимиятда қабул қилишга тайёрман», — дея таъкидлади Ўрта Чирчиқ тумани ҳокими.
Эслатиб ўтамиз, 2025 йил 15 октябрь куни Ўзбекистон Президенти 1300 гектар майдонда, Ўрта Чирчиқ ва Қуйи Чирчиқ туманлари ҳудудларида янги Тошкент халқаро аэропорти қурилишига старт берган эди. Лойиҳа тўрт босқични ўз ичига олади. 2,5 млрд долларлик биринчи босқичда аэровокзал мажмуаси ва аэродром қурилади.
Хусусий ҳамкорлар сифатида Vision Invest (Саудия Арабистони), лойиҳага «ўн миллиардлаб иен» сармоя киритадиган Sojitz (Япония) савдо уйи, шунингдек, Incheon International Airport Corporation (Корея Республикаси) компаниялари иштирок этади.
