2024 йил 27 апрель куни тахминан 23.30 ларда 18 ва 20 ёшли 2 талаба ошхона пичоғи билан қуролланган ҳолда, “Олмазор” метро бекатига келиб, Yandex Go иловаси орқали буюртма беришган. Манзил сифатида Тошкент вилояти Янгийўл туманининг “Чаманзор” маҳалласини белгилашган.
Кўрсатилган манзилга етиб боргач, талабалардан бири ҳайдовчининг бўйин қисмига пичоқ билан зарба берган. Ҳайдовчи машинадан чиқишга уринганда, иккинчи талаба уни қўлидан ушлаб турган, пичоқ ургани эса уни бўғишга киришган.
Жабрланувчининг айтишича, у мижозларни кўрсатилган манзилдан кейин қўшимча 200 м ичкарига, дала ичига олиб бориб қўйган. Талабалар ҳайдовчига уларни қулупнай теришга таниши чақирганини ва ҳозир келиб қолишини айтишган. Шундан сўнг унга ҳужум уюштиришган. Пичоқ урган талаба, ҳужумдан сўнг, иккинчи талабага тош олиб, бош қисмига зарба беришни буюрган. Иккинчи талаба бу ишни қилишдан бош тортган ва қўлидан ушлаб турган.
Ҳайдовчининг фикрига кўра, айбланувчиларда уни ўлдириш нияти бўлмаганини таъкидлаган. Чунки буни амалга оширишга уларда етарли вақт ва имконияти бўлган.
Ҳужумдан сўнг, 15-20 минут вақт оралиғида ўша ҳудудда хизмат қилаётган ички ишлар бўлими ходимлари машинани майдонда кўришган ва вазиятга ойдинлик киритиш учун боришганда, айбланувчиларни қўлга олишган.
Ҳужумчилардан бири қисман иқрор бўлди ва бундай ишга қўл уришига сабаб қилиб, катта миқдордаги қарздорлиги бўлганини айтган.
Воқеа содир бўлган куни, пичоқ урган талаба 17 ёшда бўлган ва ёшини инобатга олган ҳолда, унга 7 йил қамоқ жазоси белгиланди. Иккинчи ҳужумчига 6 йил қамоқ жазоси тайинланди. Иккаласи ҳам Фарғона вилоятининг Бешариқ туманидан келишган.
