Ўзбекистон Президенти Шавкат Мирзиёев 2025 йил 26 сентябрь куни тадбиркорларни янгича ёндашувлар асосида қўллаб-қувватлаш чора-тадбирлари тўғрисидаги фармонни имзолади.
Ҳужжатга кўра, асосий вазифа 2026–2027 йилларда 5000 та тадбиркорлик лойиҳасини амалга оширишдан иборат бўлади. Бизнесга «Тадбиркорликни ривожлантириш компанияси» томонидан 4 трлн сўм миқдорида молиявий кўмак кўрсатилади.
2025 йил 1 ноябрдан бошлаб қўшимча молиявий қўллаб-қувватлаш воситалари жорий этилади:
- Ишлаб чиқариш ва хизмат кўрсатиш лойиҳалари учун банклар орқали 10 млрд сўмгача кредитлар — ҳам миллий, ҳам хорижий валютада;
- Кичик бизнеснинг 500 млн сўмгача бўлган микролойиҳаларини қайта молиялаштириш, ставкани 6% гача, лекин Марказий банкнинг асосий ставкасидан (ҳозир 14%) 4 фоиз пунктидан юқори бўлмаган миқдоргача пасайтириш. Шарт: лойиҳа камида 5 нафар янги иш ўрни яратиши ва 3 нафар ходимга эга бўлиб, 1 йилдан ортиқ фаолият юритаётган бўлиши керак.
2025 йил 1 декабрдан бошлаб компания кафолат ва кафилликлар беради:
- Йирик корхоналарга — 10 млрд сўмгача (кредит/лизинг суммасининг 50% идан кўп бўлмаган миқдорда);
- Кенг кўламли «яшил» ва ишлаб чиқариш лойиҳаларига — кузатув кенгаши қарорига биноан;
- Яхши кредит тарихига эга тадбиркорларга — кафиллик ҳажмини 1,5 баробар ошириш билан;
- Гаров таъминотидаги етишмовчиликни қоплаш учун.
Шунингдек, алоҳида акциядорлик жамияти — кафолат бериш ташкилоти тузилиб, унга компаниянинг тегишли функциялари ўтказилади.
2026 йил 1 январдан бошлаб узоқ ва бориш қийин бўлган туманлардаги тадбиркорлар учун кредитларни қайта молиялаштириш орқали компенсация механизми жорий этилади:
- Кичик корхоналар учун 1,5 млрд сўмгача;
- Ўрта корхоналар учун 5 млрд сўмгача, Марказий банк асосий ставкасидан 4 фоиз пунктидан юқори бўлмаган ставкада.
Қайта молиялаштириш корхона ходимлари орасида Камбағал оилалар реестрига киритилган оила аъзоларининг камида қуйидаги миқдорда бўлиши шарти билан берилади:
- 5 киши — 2% гача,
- 10 киши — 4% гача,
- 20 киши — 6% гача.
Агар ҳисобот йилида мазкур шартда назарда тутилган ходимлар сони сақланиб қолса, қайта молиялаштириш давом этади; сон камайса, кредит бўйича фоиз ставкаси бозор ставкасига ўтказилади.
Агар бундай ходимлар ушбу корхонада ишга жойлашиши ҳисобига Камбағал оилалар реестридан чиқарилса, қайта молиялаштириш тартиби сақланиб қолади.
Компания 2026–2028 йилларда 500 млрд сўмлик облигациялар чиқаради. Шунингдек, унга ҳар йили 7 йил муддатга, Марказий банк асосий ставкасидан 2% пункти паст ставкада 300 млрд сўмгача бюджет ссудалари берилади. Компаниянинг 2024–2026 йиллардаги фойдаси унинг ихтиёрида қолади.
