Зулфия номидаги мукофот лауреати, қўшиқчи Ширин Абдуллаева вафот этди. Унга ҳали 20 ёш ҳам тўлмаган эди. Бу ҳақида Оила ва аёллар қўмитаси ҳамда «Ўзбекконцерт» ташкилоти хабар берди.
Ширин Абдуллаева 2005 йил 14 декабрда Наманганда туғилган. 2023 йилда санъат соҳасида Зулфия номидаги давлат мукофотига сазовор бўлган. Унинг «Лўли», «Метро», «Безори» ва бошқа қўшиқлари YouTube’да миллионлаб кўришларни тўплаган.
2021 йилда у Россиянинг НТВ телеканалидаги машҳур «Ты — супер!» шоусида иштирок этган ва ярим финалгача етган.
Ширин Абдуллаева Пекиндаги Цинхуа университетида ижтимоий фанлар йўналишида таҳсил олган. 2024 йилда ўқишини Ўзбекистонга кўчирган. Университет уни «Ўзбекистоннинг Хитойдаги маданий элчиси» деб атаган.
«У Шаолинь жанговар санъатини ўрганган. Рус, хитой ва инглиз тилларини мукаммал билган. Бир нечта фильмларда суратга тушган. Унинг клиплари интернетда катта машҳурлик қозонган. Хитой университетида 100 фоиз грант асосида таълим олган… У покиза, нурли инсон эди. Биз биргаликда қўшиқлар яратганмиз», — деб таъзия билдирди унинг «Ташаккур» қўшиғи ва бошқа бир неча асарлари матни муаллифи, шоир Бобур Бобомурод.
«Энг яхши қиз кичиги бўлади!»
Ширин Абдуллаева тадбиркор Баҳодир Абдуллаевнинг энг кичик, бешинчи қизи эди. У BA Holding асосчиси бўлиб, ушбу холдинг таркибига 20 дан ортиқ компания кирган. YouTube-блогер Жаҳонгир Латиповга берган интервьюсида унинг отаси қизи ҳақида шундай деган:
«Тўрт қизимдан кейин УЗИда бешинчи фарзандим ўғил бўлиши айтилган. Шунинг учун биз ўғил фарзанд кутганмиз, айниқса унинг онаси жуда орзу қилган эди. Биз туғруқхона ташқарисида кутганимизда ҳамшира чиқиб: „Баҳодир ака, табриклайман, сизда қизалоқ туғилди!“ деган. Мен эса кулдим ва хурсанд бўлдим. Нега эканини билмайман».
«Ичкари кириб, хотинимни қизалоғимизнинг туғилиши билан табрикладим, лекин у юзини буриб, йиғлаб юборди. У мен ғамгин бўлдим деб ўйлаган, лекин мен унга тўлиқ рози ва бахтиёр эканлигимни айтдим. Шунда мен шундай дедим: „Кўрасан, бу кичик қизимиз тўрттасидан ҳам яхши бўлади!“. Худди шундай бўлди», — деб эслади Абдуллаев қизининг туғилиши ҳақида.
