Ўзбекистоннинг Сан-Маринодаги биринчи элчиси этиб Римдаги резиденцияси билан Абат Файзуллаев тайинланди, деб хабар қилди «Дунё» ахборот агентлиги.
Элчи ишонч ёрлиқларини мамлакат раҳбарлари – капитан-регентлар Франческа Чиверкья ва Далибор Риккардига топширди.
Ишонч ёрлиқларини топшириш маросимида Сан-Марино ташқи ишлар вазири Лука Беккари аккредитация қилинган элчиларни қутлаб, Ўзбекистонда амалга оширилаётган ислоҳотлар ҳамда Сан-Марино билан мулоқотни ривожлантириш борасидаги саъй-ҳаракатларни юқори баҳолади. Шунингдек, у тарихда илк бор мазкур мамлакатда Ўзбекистон элчисининг тайинланганини ҳам мамнуният билан эътироф этди. Вазир Ўзбекистоннинг иқлим ва экологик муаммоларга қарши курашиш бўйича сиёсати ҳамда барқарор ривожланишга кўрсатаётган ҳиссасини қўллаб-қувватлади.
Маросим чоғида ўзаро савдо-иқтисодий ҳамкорликни кенгайтириш, икки томонлама шартномавий-ҳуқуқий базани мустаҳкамлаш, БМТ ва ЕХҲТ доирасидаги кўп томонлама ҳамкорликда номзодлар ва ташаббусларни ўзаро қўллаб-қувватлаш масалалари муҳокама қилинди.
Шунингдек, жорий йилда Ўзбекистонда ўтказиладиган халқаро тадбирларда Сан-Марино делегациясининг фаол иштироки таъминланиши таъкидланди.
Эслатиб ўтамиз, Ўзбекистон ва Сан-Марино ўртасида дипломатик алоқалар 2021 йил 3 февралда ўрнатилган.
Абат Файзуллаев 2023 йил ноябридан Ўзбекистоннинг Италиядаги элчиси ва Римдаги халқаро ташкилотлар (ФАО, ЖССТ, БМТ ННТ) ҳузуридаги доимий вакили ҳисобланади. 2024 йил декабридан эътиборан у Кипрдаги биринчи элчи, 2025 йил мартидан эса Мальтадаги биринчи элчи сифатида ҳам фаолият юритмоқда.
2020—2023 йилларда Абат Файзуллаев Ўзбекистоннинг Австриядаги элчиси лавозимида ишлаган, шунингдек, Венгрияда ҳам элчи вазифасини бажарган. Шу билан бирга, у Ўзбекистоннинг Европада хавфсизлик ва ҳамкорлик ташкилоти (ЕХҲТ) ҳамда Венадеги бошқа халқаро ташкилотлар ҳузуридаги доимий вакили лавозимини ҳам эгаллаган.
