Reuters агентлиги тармоқдаги бир нечта манбаларга таяниб хабар беришича, АҚШ Россиянинг икки йирик нефть компанияси — «Роснефтъ» ва «Лукойл»га қарши санкциялар жорий этганидан сўнг, Хитойнинг йирик давлат компаниялари Россия нефтини денгиз орқали етказиб бериш бўйича харидларни тўхтатди.
Reuters маълумотларига кўра, PetroChina, Sinopec, China National Offshore Oil Corporation (CNOOC) ва Zhenhua Oil нефть компаниялари санкциялар хавфи туфайли, ҳеч бўлмаганда қисқа муддатда, денгиз орқали етказиб бериладиган Россия нефти билан «операциялардан тийилишади».
Агентликнинг қайд этишича, Хитой кунига тахминан 1,4 млн баррел Россия нефтини денгиз орқали импорт қилади. Бу ҳажмнинг асосий қисми мустақил нефтни қайта ишлаш заводлари, жумладан, кичик операторлар томонидан сотиб олинади. Трейдерларнинг сўзларига кўра, мустақил НҚИЗлар санкциялар оқибатларини баҳолаш учун харидларни тўхтатиб туриши мумкин, аммо уларни қайта тиклашга интилади.
Хитой давлат компанияларининг Россия нефтини сотиб олиш баҳолари турлича, дея аниқлик киритади Reuters. Vortexa таҳлилчилари маълумотларига кўра, 2025 йилнинг дастлабки 9 ойи давомида бундай етказиб беришнинг кунлик ҳажми 250 минг баррелдан камроқни ташкил этади; Energy Aspects бу кўрсаткични 500 минг баррель деб баҳолаган.
Денгиз орқали етказиб бериладиган Россия нефтининг энг йирик харидори бўлган Ҳиндистоннинг нефтни қайта ишлаш заводлари ҳам АҚШ санкцияларини бузмаслик учун Россиядан хом нефть импортини кескин қисқартиришни режалаштирмоқда.
Reuters ёзишича, Россия нефтининг 2 йирик харидори томонидан талабнинг кескин пасайиши Москва даромадларига таъсир қилади ва жаҳон импортчиларини муқобил етказиб бериш манбаларини излашга мажбур қилади, бу эса жаҳон нархларининг ошишига олиб келади.
АҚШ Молия вазирлиги 2025 йил 22 октябрь куни Россиянинг Украинага қарши урушни тўхтатиш бўйича «тинчлик жараёнига жиддий содиқликнинг йўқлиги» сабабли «Роснефтъ» ва «Лукойл», шунингдек уларнинг бўлинмаларига қарши санкциялар жорий этилганини эълон қилган эди.
