Жиззах вилояти Арнасой тумани жиноят ишлари бўйича суди 2025 йил 24 февраль куни бўлиб ўтган мажлисда собиқ депутат ва блогер Қобул Дусовга нисбатан ҳукм чиқарди. Бу ҳақида Ўзбекистон Олий суди матбуот хизмати хабар берди.
Суд материалларига кўра, Дусов Жиззах вилояти мактабгача ва мактаб таълими бошқармаси тузилмасидаги тўрт нафар ходимни туҳмат ва ҳақорат қилган. Улар — Жиззахдаги 16-мактаб мудираси Нодира Ялгашева, туман мактабгача ва мактаб таълими бўлими раҳбари Озода Камолова, 18-мактаб директори Шаҳноза Ҳасанова ҳамда собиқ сенатор ва «Умид» интернати директори Санобар Суярова.
Собиқ депутат Telegram-каналида улар ҳақида турли маълумотларни эълон қилган.
Судья Ш. Ишимов айбланувчини Ўзбекистон Жиноят кодексининг 139-моддаси 3-қисми «а» банди (оғир ёки ўта оғир жиноят содир этганликда туҳмат қилиш) ва 140-моддаси 3-қисми «а» банди (жабрланувчининг хизмат ёки фуқаролик бурчини бажаришга боғлиқ ҳолда ҳақорат қилиш) бўйича айбдор деб топди.
Суд айбланувчининг жиноят содир этгани жабрланувчилар ва гувоҳларнинг кўрсатмалари, суд-лингвистик экспертиза хулосаси ва ёзувларнинг скриншотлари орқали тўлиқ исботланган деб ҳисоблади.
Шу билан бирга, Дусовга нисбатан Мирзачўл тумани маданият бўлими бошлиғи Мирсаид Эшимқуловга туҳмат қилиш ва ҳақоратлаш, шунингдек, Ҳасанова ва Камоловага боғлиқ айрим ҳолатлар бўйича айбловлар жиноят таркиби мавжуд эмаслиги сабабли бекор қилинди.
Суд Дусовни 1 йил 2 ой муддатга озодликдан маҳрум этишга ва жазони колония-поселениеда ўташга ҳукм қилди.
2024 йил ноябрь ойида Тошкент шаҳри Чилонзор тумани жиноят ишлари бўйича суди Қобул Дусовни Ўзбекистон мактабгача ва мактаб таълими вазири ўринбосари Фарҳод Боқиевни ҳақорат қилганликда айбдор деб топиб, 1 йил озодликни чеклаш жазосини тайинлаган эди.
2025 йил январь ойида эса Тошкент шаҳри Яшнобод тумани жиноят ишлари бўйича суди Дусовнинг 11 ой 2 кун қолган жазо муддатини озодликдан маҳрум этиш жазосига алмаштирди. Бу қарор унинг озодликни чеклаш шароитларини бузгани сабабли қабул қилинган.
Кобул Дусов — Тошкент вилояти Бўстонлиқ туманидан сайланган собиқ депутат ва интернетдаги турли можароли постлар муаллифи. У ўз чиқишларидан бирида агар сиёсатда аёллар ва болалар ҳукмронлик қилса, «мамлакат тез орада таназзулга учрайди» деб ёзган. «Мамлакат ривожи эркакларнинг табиати билан боғлиқ, улар ҳиссий тебранишларга мойил эмас ва ҳар қандай вазиятда қарор қабул қила олади», — деган эди у. У асосан таълим масалаларини кўтариб келади.
