Ўзбекистоннинг олтин-валюта захиралари 2026 йил 1 апрель ҳолатига кўра 68,99 млрд долларгача камайди, бу Марказий банк маълумотларида акс этган. Бу кўрсаткичнинг июль ойидан бери илк бор пасайиши.
2026 йил март ойида халқаро захиралар 8,1 млрд долларга (-10,5%) камайди ва амалда 2026 йил бошидан бери кузатилган барча ўсишни йўққа чиқарди.
Бунга жаҳон бозорларида олтин нархининг тушиши асосий омил бўлди. Марказий банк баҳосига кўра, нархнинг бир унция учун 5174,1 доллардан 4553,95 долларгача пасайиши (-12%) захираларни 8,3 млрд долларга камайтирди (декабрда 2,9 млрд доллар, январда 8,6 млрд доллар, февралда эса 1,4 млрд доллар ўсиш бўлган эди).
Захиралардаги қимматбаҳо металнинг физик ҳажми кетма-кет олтинчи ой давомида ортиб бормоқда (Марказий банк бу вақт ичида олтин сотиш ўрнига уни сотиб олди). Март ойида у 280 минг троя унциясига (8,7 тонна) кўпайиб, 13,36 млн унцияни (415,5 тонна) ташкил этди. Бу статистика юритила бошлангандан бери рекорд кўрсаткич.
Жаҳон нархлари пасайиши фонида олтин захирасининг қиймати 6,82 млрд долларга камайиб, 60,85 млрд долларни ташкил этди. Олтин мамлакат жами захираларининг қарийб 88,2 фоизини ташкил этади.
Захираларнинг валюта қисми, ўтган ойдагидек, яна 1,27 млрд долларга камайиб, 7,57 млрд долларни ташкил этди (2025 йил 1 январдан бери энг паст кўрсаткич).
Қимматли қоғозлар ҳажми бироз ўсиб, 1,54 млрд долларга етди.
Халқаро стандартларга кўра, Ўзбекистон захираларининг даражаси жуда юқорилигича қолмоқда. Улар қарийб 17,5 ойлик импортни қоплашга қодир, ваҳоланки Халқаро валюта жамғармаси томонидан тавсия этилган минимал кўрсаткич 3 ойни ташкил этади.
Марказий банк аввалроқ захиралар таркибида олтиннинг юқори улуши активларни бошқаришга консерватив ёндашувни акс эттиришини таъкидлаган эди. Шу билан бирга, регулятор қимматбаҳо металлар нархининг ўзгарувчанлиги хавфини ҳисобга олган ҳолда портфелни босқичма-босқич диверсификация қилишни бошлади.
Халқаро захиралар макроиқтисодий барқарорликнинг асосий воситаси бўлиб қолмоқда. Улар миллий валюта курсининг тебранишларини юмшатиш, ташқи мажбуриятларга хизмат кўрсатиш, инқирозли вазиятларда импортни молиялаштириш ва иқтисодиётни ташқи шоклардан — хомашё нархларининг тушишидан молиявий бозорлардаги беқарорликкача ҳимоя қилиш имконини беради.