Хитойнинг Leapmotor енгил автомобиллари бўйича жорий этилган чекловлар юзасидан Ўзбекистонда музокаралар давом этмоқда. Бу ҳақида Техник тартибга солиш соҳасида назорат бўйича инспекция матбуот хизмати хабар берди.
Яқин кунларда Ўзбекистонга Leapmotor мутахассисларининг ташрифи кутилмоқда. Ташриф доирасида компания маҳсулотлари қайта синовдан ўтказилади. Автомобиль синовлари Leapmotor мутахассислари иштирокида ўтказилади.
Бундан аввал, инспекция Техник тартибга солиш агентлиги қошидаги Ўзбек сифат назорати илмий-тажриба маркази (UzTest)га мурожаат қилиб, Leapmotorнинг енгил автомобилларини сертификатлашни тўхтатиб туришни сўраган эди.
Бунга сабаб — C16 моделида аниқланган электромагнит халақитлар даражаси белгиланган меъёрдан ошиб кетгани бўлди. Гарчи бу бузилиш фақат бир моделда аниқланган бўлса-да, сертификатлаш барча моделлар учун тўхтатилди.
Синовларнинг тўхтатилиши амалда автомобилларнинг мамлакатга олиб кирилишини тақиқлашни англатади, чунки сертификатсиз транспорт воситаларини импорт қилиш мумкин эмас.
Autodeklarant Telegram-канали муаллифи ҳам шундай савол берди: нима учун бир техник нуқсон туфайли бутун бренднинг импорт қилиниши чекланди?
«Техник тартибга солиш инспекцияси: сиз бренднинг фақат бир моделидан „нуқсон“ топдингиз — ва бутун брендни импорт қилишни чекладингиз. Унда нега бошқа моделлар бўйича алоҳида текширувлар ўтказасиз, агар бир моделга асосланиб, барчасига хулоса чиқараётган бўлсангиз?», — деб ёзади у.
Жамоатчилик вакиллари эса бу вазиятни маҳаллий ишлаб чиқарувчилар манфаати йўлида бозорни «тозалаш» ҳаракати сифатида баҳолашди. Блогер Умид Ғафуров таъкидлашича, Европада ҳам сотиладиган Leapmotor Ўзбекистонда «нуқсонли» деб топилди, бироқ 30 йилдан бери ишлаб чиқарилаётган Damas «гуёки савол туғдирмайди».
«Энди аниқ бўлдики, Ўзбекистонга Leapmotor олиб кириб бўлмас экан — унда, гўёки, нуқсон бор. Ҳолбуки, бу бренд бутун дунёда тан олинган. Унинг инвесторлари орасида йирик халқаро компаниялар бор. Автомобиллар Европада расман сотилади. Аммо Ўзбекистонда ундан нуқсон топилди. Эслатиб ўтаман: Ўзбекистонда 30 йилдан бери Damas ишлаб чиқарилади ва у, аниқланишича, нуқсонсиз экан — гўёки барча стандартларга жавоб беради. Аниқландики, Leapmotor эса жавоб бермас экан… Мен шахсан синов полигонида бўлганман. У ерда машиналар синовдан ўтказилади. Менинг машинамга икки-уч дақиқа вақт ажратишди. Ҳатто ҳайдовчига синов жараёнини кузатишга ҳам рухсат берилмади», — дейди у.
2024 йил ноябрь ойидан бери Техник тартибга солиш агентлиги импорт автомобилларни техник кўрикдан ўтказиш тартибини ўзгартирди. Эндиликда бундай транспорт воситалари божхона ҳудудида эмас, балки махсус полигонда электромагнит мослик бўйича синовдан ўтказилади.
Янги тартиб расмий дилер бўлмаган жисмоний шахслар ва хусусий тадбиркорлар томонидан импорт қилинадиган автомобилларга нисбатан қўлланилади. Синовлар агентликнинг «UzTest» корхонаси томонидан амалга оширилади. Бу эса, айрим бозор иштирокчилари фикрига кўра, манфаатлар тўқнашувига олиб келиши мумкин.
