Тошкент вилоятининг Оҳангарон туманида 2005 йилда туғилган фуқаро ва унинг 3 нафар шериги ҳибсга олинди. Улар тергов версиясига кўра, кредит лимитлари билан боғлиқ фирибгарлик ёрдамида 1,03 млрд сўмни ўзлаштирган. Бу ҳақда ИИББ матбуот хизмати хабар берди.
Маълум бўлишича, жиноятчилар Telegram ва Instagram’да «Limitlash xizmati» («Лимитлаш хизмати») саҳифасини очиб, фуқароларга микромолия ташкилотлари томонидан мижозларга ажратилаётган кредит лимитларини нақдлаштириб беришни ваъда қилишган. Улар бу фаолиятни ўзлари рўйхатдан ўтказган юридик шахс орқали олиб боришган.
Фуқароларга микромолия ташкилоти томонидан товар сотиб олиш учун кредит (масалан, 10 млн сўм) ажратилгани тушунтирилган. Сўнгра гумонланувчилар «фойдали» вариантни таклиф қилишган: бутун кредит лимитини гўёки нақдлаштириш учун уларга ўтказиш, лекин аслида ўтказилган пулларни ўзлаштириб олиш.
Ички ишлар вазирлиги Киберхавфсизлик маркази маълумотларига кўра, жиноятчилар Nasiya иловаси орқали фуқаролар номига қарз расмийлаштиришган. Фирибгарлар ҳаракатидан 600 дан ортиқ киши жабр кўрган.
Мазкур ҳолат юзасидан Жиноят кодексининг 168-моддаси 4-қисми «а» банди (жуда кўп миқдорда фирибгарлик) билан жиноят иши қўзғатилган, жиноятчилар эҳтиёт чораси сифатида қамоққа олинган. Ҳозирда тергов дамовом этмоқда.
Хабарда қайд этилишича, 2025 йил бошидан буён ўтган 10 ой ичида Тошкент вилоятида содир этилган барча жиноятларнинг 44%ни кибержиноятлар ташкил этган.
Аввалроқ, Пенсия жамғармаси пенсия миқдорини оширишни ваъда қилиб, шахсий маълумотларни қўлга киритаётган ва пул талаб қилаётган фирибгарлардан фуқароларни огоҳлантирган эди. «Жамғарманинг бирон бир ходими фуқароларга кўчада пенсияни оширишда ёрдам беришни таклиф қилмайди», — дея таъкидлаган ташкилот.
