Ўзбекистонда уй-жойни фойдаланишга қабул қилиш жараёни соддалаштирилади. Бу Президентнинг 2025 йил 21 февралдаги фармонида назарда тутилган.
2025 йил январь ойида ўтказилган йиғилишда, ҳозирги кунда пудратчилар қурилишни бошлаш учун ҳужжатларни камида 5 босқичда мувофиқлаштириши кераклиги ва бу жараён икки ойгача вақт олиши таъкидланган эди.
Фармонга мувофиқ, 2025 йил 1 майдан бошлаб қурилишни бошлашдан тортиб, уни фойдаланишга топширишгача бўлган барча жараёнлар “Шаффоф қурилиш” (Прозрачное строительство) тизими орқали онлайн шаклга ўтказилади.
Эндиликда пудратчилар тайёр лойиҳани идоралар билан онлайн тарзда мувофиқлаштириши мумкин бўлади. Камчиликлар аниқланган тақдирда, улар қурилиш жараёнида бартараф этилади.
Уйни фойдаланишга топшириш учун эндиликда фақат Қурилиш ва уй-жой коммунал хўжалиги соҳасида назорат инспекцияси ҳамда Давлат ёнғин назорати хизмати хулосаси талаб этилади.
Шу билан бирга, буюртмачи томонидан ишлаб чиқилган дастлабки лойиҳа ҳужжатлари шаҳарсозлик экспертизасидан олдин санитария-эпидемиология хизмати, экология идоралари, шунингдек, ногиронлар жамоат бирлашмалари вакиллари билан келишилади.
Лойиҳанинг мувофиқлаштирилган ҳужжатларга мувофиқ амалга оширилишини Қурилиш инспекцияси назорат қилади.
Шунингдек, қурилиш инспекцияси назоратида барпо этилган ва Инспекцияда рўйхатдан ўтган кўп қаватли уйлар учун инструментал-техник текширув амалиёти бекор қилинади.
Шу билан бирга, сейсмик барқарорлик бўйича инструментал-техник хулоса қурилиш жараёнида кўп қаватли уйни текширган лаборатория томонидан берилади.
2025 йил 1 апрелдан бошлаб Тошкентда тажриба тариқасида кўп қаватли уйлар лойиҳасини ишлаб чиқишга рухсат бериш ва меъморий-планировка топшириғини тайёрлаш жараёнлари бирлаштирилади. Бу муддатларни икки баравар қисқартиришга ёрдам бериши кутилмоқда.
Тўрт ой давомида Қурилиш ва уй-жой коммунал хўжалиги вазирлиги ҳамда Давлат активларини бошқариш агентлиги рақамли платформани тест режимида ишга тушириши лозим. У ер участкаларини қурилиш учун ажратишдан тортиб, биноларни фойдаланишга қабул қилишгача бўлган барча босқичларни ўз ичига олади.
Фармонга мувофиқ, 2025 йил 1 мартдан кўп қаватли уйларни реновация доирасида қуришнинг янги тартиби жорий этилади. Лойиҳаларни амалга ошириш барча мулкдорларнинг нотариал розилигидан кейингина мумкин бўлади. Уй эгаларига компенсациянинг уч тури таклиф этилади. Реновация тартиби тўғрисидаги ҳужжат 2025 йил 1 сентябргача ишлаб чиқилиши режалаштирилган.
