Dream House Design компаниясининг шаҳарсозлик нормалари ва қоидаларига зид бўлган лойиҳани ишлаб чиққани учун лицензияси бекор қилинди. Бу ҳақда Ўзбекистон Қурилиш ва уй-жой коммунал хўжалиги вазирлиги матбуот хизмати хабар берди.
Компания фаолиятида бир қатор қоидабузарликлар илк бор 2023 йил август ойида аниқланган, ўшанда Қурилиш ва Уй-жой коммунал хўжалиги соҳасида назорат инспекцияси ташкилотга нисбатан чора кўриш бўйича тақдимнома киритган.
2024 йил февраль ойида Қурилиш ва Уй-жой коммунал хўжалиги вазирлигига Олмазор тумани Фаробий ва Ҳуррият кўчалари аҳолисидан мурожаат келиб тушган. Унда фуқаролар Glorius Chigatoy компанияси томонидан олиб борилаётган қурилиш ишлари, шунингдек, Dream House Design томонидан ишлаб чиқилган лойиҳа ҳужжатларидан норозилик билдиришган.
Ўрганишлар давомида компания Glorius Chigatoy учун «Пастки қаватда савдо ва маиший хизмат кўрсатиш объектлари бўлган бизнес маркази ва автотураргоҳ мажмуаси» лойиҳасини шаҳарсозлик нормалари ва қоидаларини бузган ҳолда ишлаб чиққани аниқланди.
Хусусан, лойиҳа бинолар орасидаги масофа, инсоляция (қуёш нурининг кириб келиши) таъминланиши ва қўшни участка эгалари билан келишиш талабларини ҳисобга олмаган.
Қурилиш ва уй-жой коммунал хўжалиги вазирининг буйруғи билан компания лицензиясининг амал қилиш муддати 10 кунга тўхтатилди. Унга қоидабузарликларни бартараф этиш учун муддат берилган, аммо бу бажарилмаган. Шундан сўнг вазирлик лицензиянинг амал қилиш муддатини вақтинча тўхтатиш бўйича Тошкент туманлараро иқтисодий судига даъво аризаси киритган.
2024 йил 18 июлдаги суд қарори билан компания лицензиясининг амал қилиши вақтинча тўхтатилган. Қоидабузарликлар бартараф этилмагани сабабли, кейинчалик ўша суднинг 2025 йил 11 сентябрдаги қарори билан Dream House Design’нинг лицензияси бутунлай бекор қилинди ва давлат реестридан чиқарилди.
Компаниянинг устав капитали 112,85 млн сўмни ташкил этади. Унинг муассислари сифатида Беҳзод Тўхтапўлатов (89,86%), Абдулла Абдусаломов (6%) ва Мансурхон Ишонов (4,14%) кўрсатилган.
Dream House Design компанияси номида Dream сўзи бўлган бошқа компаниялар билан боғлиқ эмас.
