Ўзбекистонда 29 та йирик давлат корхонасини хусусийлаштириш режалаштирилган. 2025 йил 21 апрель куни президент томонидан имзоланган қарорда назарда тутилган.
Бунинг учун халқаро ва маҳаллий бозорларда оммавий савдоларга қуйидаги акция пакетлари (улушлар)ни чиқариш ва халқаро машҳур консалтинг компанияларни жалб этиш топширилди:
| Корхона номи | Улуш (%) | Савдога чиқариш муддати |
|---|---|---|
| Universal Mobile Systems (Mobiuz) | 100 | 2025 йил III чорак |
| UzAuto Motors | 99,7 | 2026 йил I чорак |
| UzAuto Motors Powertrain | 100 | 2025 йил IV чорак |
| Ўзбекинвест | 75,24 | 2025 йил III чорак |
| Ўзагросуғурта | 99,35 | 2026 йил I чорак |
| Uzbekistan GTL | 100 | 2026 йил II чорак |
| Ўзбекгидроэнергоқурилиш | 96,7 | 2025 йил IV чорак |
| Трансгазмахсусқурилиш | 77,6 | 2025 йил IV чорак |
| Махсусэнергогаз | 41 | 2025 йил IV чорак |
| Тўрақўрғон ИЭС | 100 | 2025 йил IV чорак |
| Янгиангрен ИЭС | 99,6 | 2025 йил IV чорак |
| Ангрен ИЭС | 100 | 2025 йил IV чорак |
| Сирдарё ИЭС | 100 | 2025 йил IV чорак |
| Муборак ИСТ | 100 | 2025 йил IV чорак |
| Фарғона ИСТ | 100 | 2025 йил IV чорак |
| Тошкент ИСТ | 100 | 2025 йил IV чорак |
| Тошкент ИЭЦ | 100 | 2025 йил IV чорак |
| Навоий ИЭЦ | 100 | 2025 йил IV чорак |
| Тахиатош ИЭЦ | 100 | 2025 йил IV чорак |
| Технопарк | 100 | 2026 йил I чорак |
| Uzbek Leasing International | 45,5 | 2026 йил I чорак |
| Ўзагролизинг | 97,5 | 2026 йил I чорак |
| Тошкент трактор заводи | 100 | 2026 йил I чорак |
| Шеробод цемент заводи | 100 | 2025 йил IV чорак |
| Йўлқурилиш | 100 | 2025 йил III чорак |
| Ўзсувқурилиш | 100 | 2025 йил III чорак |
| Шарғункўмир | 99,93 | 2025 йил IV чорак |
| Ўзметкомбинат | 91 | 2026 йил I чорак |
| Навоийазот | 75 | Алоҳида жадвал асосида |
Ишончли бошқарувга берилган давлат улушлари, биринчи навбатда, баҳолаш қиймати бўйича бошқарувчиларга сотувга чиқарилади.
Миллий инвестиция жамғармаси устав капиталига ўтказилган акция пакетлари жамоатчилик савдоси доирасида Давлат активларини бошқариш агентлиги (ДАБА) ва ушбу жамғарма ҳамкорлигида ягона пакет сифатида сотилади. Тушган маблағлар акциялар сонига мутаносиб равишда тақсимланади.
Давлат иштирокидаги корхоналар устав капиталидаги улушлар, хўжалик жамиятларига берилган активларнинг қолдиқ (баланс) қиймати миқдорига камайтирилади.
Активларни савдога чиқариш бўйича қарорни Бош вазир Абдулла Арипов раҳбарлигидаги Давлат хусусийлаштириш комиссияси қабул қилади. Қарорлар давлат иштирокидаги корхоналарнинг амалдаги қарз шартномалари молиявий шароитларини ҳисобга олган ҳолда қабул қилинади.
Шунингдек, ҳужжатда давлат корхоналарини халқаро очиқ савдоларга чиқариш ва сотиш тартиби белгиланди.
Иқтисодиёт ва молия вазирлиги халқаро бозор вазияти, ишлаб чиқариш салоҳияти ва стратегик инвесторлар қизиқишини инобатга олган ҳолда хусусийлаштириш моделлари ва жадвалларини ишлаб чиқади ҳамда уларни Давлат комиссияси тасдиғига тақдим этади.
Давлат активларини бошқариш агентлиги савдоларни ташкил этиш учун машҳур халқаро консалтинг ва юридик ташкилотларни жалб этади.
UzAssets Investment Company ёки агентликнинг ўзи «катта тўртлик»ка кирувчи баҳолаш компаниялари билан тендерсиз шартнома тузиш ҳуқуқига эга бўлади.
Халқаро ташкилотлар тайёрлаган баҳолаш хулосаси савдоларда бошланғич нархни белгилашда асос сифатида қабул қилинади, ҳатто у миллий баҳолаш стандартларига мос келмаса ҳам.
Баҳолаш хулосаларини экспертизадан ўтказиш талаб қилинмайди. Уларда кўрсатилган нарх бошланғич баҳони аниқлашда базавий нарх сифатида қабул қилинади.
Хусусийлаштириш бўйича Давлат комиссияси моделлар ва жадвалларни тасдиқлайди, бутун савдо жараёнини мувофиқлаштиради.
Шу қарор доирасида президент Навоий ва Олмалиқ КМК, Uzbekistan Airways, «Ўзбектелеком» ва Миллий инвестиция жамғармаси каби 12 йирик давлат компанияларининг IPO ва SPO жамоатчилик ва иккинчи босқичдаги савдолар графигини ҳам тасдиқлади. Илгариги режада 2−5% акциялар чиқарилиши кўзда тутилган бўлса, энди бу кўрсаткич 10−25% этиб белгиланди.
