Қирғизистон Ташқи ишлар вазирлиги Европа Иттифоқини Қирғизистон банкларига нисбатан ЕИ томонидан киритилган санкцияларнинг асослилигини тасдиқлаш ва мустақил текширув ўтказишга чақирди.
«Қирғизистон Республикаси Европа Иттифоқини кўриб чиқилаётган ҳар қандай чекловчи чоралар ишончли ва текширилган маълумотларга асосланганлигини тасдиқлаш ва ҳақиқий ҳолатларни текшириш учун халқаро миқёсда тан олинган мустақил аудитни ўтказишни бошлашга расман таклиф қилади», — дейилади ТИВ баёнотида.
Вазирлик, шунингдек, «маълумотларнинг мунтазам алмашинуви, транзакцияларни мониторинг қилиш ва хавфларни биргаликда баҳолаш»ни амалга оширадиган Қирғизистон — Европа Иттифоқи қўшма техник ишчи гуруҳини тузишни таклиф қилди.
ТИВ Қирғизистон юридик шахсларининг ЕИ санкциялар рўйхатига киритилганидан афсус билдирди ва мамлакат «ўзининг халқаро мажбуриятларига қатъий риоя қилиши»ни, шунингдек, санкцияларни четлаб ўтиш хавфининг олдини олиш учун ЕИдаги шериклар билан «очиқ ва конструктив мулоқот» олиб бораётганини таъкидлади.
«Европа Иттифоқи изчил равишда Марказий Осиё давлатлари билан стратегик шерикликни қуриш ва жумладан, мамлакатимизнинг ижтимоий-иқтисодий ривожланишига кўмаклашиш ниятида эканини билдириб келмоқда. Бу нуқтаи назардан, Қирғизистон томони ҳам Европа Иттифоқи ва унинг аъзолари билан тенг, ўзаро ҳурмат ва ишончга асосланган шерикликка тайёр. Бундай ёндашув бир томонлама санкцион босимдан фарқли ўлароқ, ўзаро манфаатли мақсадларга эришиш имконини беради», — дейилади баёнотда.
Бир кун аввал Европа Иттифоқи Россияга қарши 19-санкциялар пакети доирасида Қозоғистон, Қирғизистон, Тожикистондаги бир қатор банклар билан транзакцияларга чекловлар жорий қилди. Хусусан, санкциялар остига Россиянинг ВТБ банкининг Қозоғистондаги филиали, Қирғизистоннинг «Толубай» ва «Евразия жамғарма банки», Тожикистоннинг «Душанбе Сити банк», «Спитамен» ва «Коммерцбанк» банклари тушди.
