Тошкентнинг Яшнобод тумани жиноят ишлари бўйича суди 2025 йил 30 сентябрь куни 56 ёшли эркак томонидан содир этилган ўлим билан боғлиқ йўл-транспорт ҳодисаси иши бўйича ҳукм чиқарди.
Хусусий фирмада юрист бўлиб ишлайдиган эркак (расмий ҳужжатда унинг исми яширилган) 2025 йил 2 май куни тахминан соат 16:10 да BYD автомобилини бошқариб, Абдулла Қодирий кўчаси бўйлаб ҳаракатланган. Фарғона йўли кўчасига чапга бурилаётганда, у белгиланган пиёдалар ўтиш жойидан ўтаётган 1949 йилда туғилган аёлни уриб юборган.
Аёл тан жароҳатлари олиб, Республика №1 клиник шифохонасининг жонлантириш бўлимига ётқизилган. Кўрсатилган тиббий ёрдамга қарамай, у 2025 йил 9 май куни вафот этган.
Суд мажлисида судланувчи қисман айбини тан олди. У ўша куни ўғлини Миробод туманидаги мактабдан олиб, сўнгра қизининг мактабига йўл олганини айтди. Унинг сўзларига кўра, чорраҳага яқинлашаётганда светофор ишламаётган, ҳаракатни ЙҲХ ходими бошқариб турган.
У тўхтаб, рухсат берувчи сигнални кутганини, аммо инспектор қарши оқимни тўхтатиб, ҳаракатга рухсат берганда, регулатор ёнига жуда яқин келган Lacetti автомобилига эътиборини қаратгани ва пиёдани пайқамаганини айтди. Судланувчи уриб юборгандан сўнг дарҳол машинадан тушиб, жабрланувчининг ёнига борганини, ўша пайтда воқеа гувоҳлари тез ёрдамни чақиришганини ва аёлни шифохонага олиб боришганини таъкидлади.
Экспертиза машинанинг уриш пайтидаги тезлиги соатига 30 км бўлганини ва ҳайдовчи тормоз педалини ўз вақтида тез босса, ҳодисанинг олдини олиш мумкин бўлганини кўрсатди.
Судланувчи шифохонага ташриф буюрганини, даволаниш, операция ва дори-дармонлар учун моддий ёрдам кўрсатганини, кейинчалик вафот этганнинг қонуний вакили — набирасига етказилган моддий зарарни қоплаганини маълум қилди. Қиз унга даъвоси йўқлигини билдирди. Эркак суддан жазони юмшатишни сўради.
Марҳумнинг набираси бувисининг телефонида жойлашувни кузатиш дастури бўлганини маълум қилди. 2025 йил 2 май куни соат 19:40 ларда у бувисининг шифохонада эканлигини кўриб, етиб боргач, уни машина уриб юборганини билибди. У ҳайдовчига даъвоси йўқлигини тасдиқлади.
Суд эркакни Ўзбекистон Республикаси Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш, одам ўлимига сабаб бўлиш) бўйича айбдор деб топиб, унга 5 йил озодликдан маҳрум қилиш ва транспорт воситаларини бошқариш ҳуқуқидан 2 йил муддатга маҳрум қилиш жазосини тайинлади. УКнинг 72-моддаси (шартли ҳукм) қўлланилиб, суд жазони 2 йиллик синов муддати билан шартли деб ҳисоблашга қарор қилди.
Жазо тайинлашда жабрланувчи томоннинг даъвоси йўқлиги, судланувчининг оилавий аҳволи (у оилада ягона боқувчи ҳисобланади) ва бошқа омиллар ҳисобга олинди.