Ички ишлар вазирининг маслаҳатчиси, собиқ ИИВ раҳбари (1991–2006 йиллар) Зокиржон Алматов Фарғона вилоятининг Фурқат туманидаги ИИБ ходимлари солиқ инспекцияси бошлиғини обрўсизлантириш мақсадида мактаб директорини ечинтириб, калтаклаб, ҳақорат қилган вазиятга изоҳ берди.
«Бу ақлга сиғмайдиган шафқатсизлик, — деди у 2025 йил 7 октябрь куни бўлиб ўтган матбуот анжуманида журналистларга. — Ўйлайманки, бу раҳбар (мактаб директори ва солиқ инспекцияси бошлиғини калтаклашни уюштирган туман ИИБ бошлиғи — таҳр.) ўз лавозимини нотўғри йўл билан олган».
«Йўл қўйилган чегаралардан чиққан бундай раҳбарларни ҳеч қачон кечирмаймиз», — деди.
ИИБ ходимларига мурожаат қилар экан, у шундай деди: «Биз атрофдагиларга нисбатан раҳмдиллик ва бефарқ бўлмаслик каби туйғуларни сақлаб қолишимиз шарт. Биз фақат одамларни қамаш учун яратилмаганмиз. Ички ишлар ходимлари одамларга ғамхўрлик қилиш, уларга ёрдам бериш учун мавжуд. Биз буни ҳеч қачон унутмаслигимиз керак. Аммо инсонийликдан чиққанлар қонун бўйича жазоланиши керак».
Зокиржон Алматов Фарғона вилоятидаги воқеа юзасидан махсус текширув ўтказилаётганини маълум қилди.
Аввалроқ сенатор Малика Қодирхонова бу ҳодиса «тизим камчиликлари ва қонун бузилишларига қатъий баҳо беришни талаб қиладиган жиддий дарс» бўлиши кераклигини айтган эди.
Ўзбекистон Олий суди Фурқат тумани ИИБ бошлиғи ва унинг ўринбосари Жиноят кодексининг 6 моддаси бўйича айбланаётганини хабар қилди. Иш Қува тумани жиноят ишлари бўйича судида кўриб чиқилмоқда. Ишда ноқонуний ҳаракатларда иштирок этган бошқа ходимларнинг бор-йўқлигига аниқлик киритилмаган.
