Ўзбекистон АҚШда учта консуллик очишни ва янги авиарейсларни йўлга қўйишни режалаштирмоқда. Бу ҳақда 2026 йил 17 январь куни элчилар ва тадбиркорлар учрашувида Ўзбекистоннинг АҚШдаги элчиси Фурқат Сиддиқов маълум қилди.
Унинг сўзларига кўра, 2026 йилдан бошлаб АҚШ фуқаролари учун визасиз режим жорий этилмоқда, бу эса туристик соҳа учун янги истиқболларни очади.
У Ўзбекистон ва АҚШ ўртасидаги муносабатлар илк бор энг юқори даражага етганини ва мамлакатнинг АҚШдаги дипломатик иштироки кенгайтирилишини таъкидлади.
«Тарихда илк бор Ўзбекистон ва АҚШ ўртасидаги муносабатлар энг юқори даражага чиқди. Президент қарорларидан келиб чиқиб, охирги 30 йил давомида Вашингтонда элчихонамиз ва Нью-Йоркда бош консуллигимиз фаолият юритиб келаётган эди. Бироқ сўнгги президент қарорларига мувофиқ, яна учта янги бош консуллик — Чикаго, Сан-Франциско ва Вашингтон штатида очиш режалаштирилган», — деди дипломатик ваколатхона раҳбари.
Элчи қайд этганидек, бу мамлакатнинг туристик салоҳиятини тарғиб қилиш учун қўшимча имкониятлар яратади. У шунингдек, бугунги кунда Ўзбекистон минтақада АҚШни Марказий Осиё ва Европа билан тўғридан-тўғри боғловчи ягона давлат эканини эслатиб ўтди.
«Ўзбекистондан авиарейслар ҳафтасига беш марта амалга оширилмоқда, бу ҳам ўзига хос кўприк ва бундан фаол фойдаланиш зарур».
Фурқат Сиддиқов авиақатновлар географиясини кенгайтириш масаласи ҳам кўриб чиқилаётганини маълум қилди:
- «Биз Флорида ёки Калифорнияга қўшимча рейслар очиш имкониятини кўриб чиқяпмиз. Бу салоҳиятнинг янада кенгайишини англатади».
Шу муносабат билан у туроператорларни айнан америкалик сайёҳларга йўналтирилган маҳсулотлар ишлаб чиқишга чақирди.
«Мен ҳурматли туроператорларга айнан Америка бозорига мослаштирилган туристик пакетларни ишлаб чиқишни таклиф қилган бўлардим. Биласизми, АҚШ бозори анча талабчан ва стандарт қолипдаги таклифлар бу ерда ишламайди».
У сайёҳлар оқими ўсиши бўйича статистикани келтирди: «Ўтган йили янги виза режими жорий этилганидан сўнг Ўзбекистонга қарийб 40 минг киши ташриф буюрди, ваҳоланки 2024 йилда улар сони 25 минг атрофида эди. Динамика аён ва тўғри иш олиб борилса, бу кўрсаткични сезиларли даражада ошириш мумкин».
Алоҳида равишда Фурқат Сиддиқов АҚШда истиқомат қилувчи ватандошлар учун мўлжалланган «Ватандош пакетларини» ривожлантиришни таклиф қилди.
«Ҳозир АҚШда ўзбекистонликларнинг учинчи авлоди улғаймоқда, уларнинг кўпчилиги тилни ва ватан билан алоқани йўқотмоқда. Агар ватандошлар учун махсус турлар таклиф этилса, ишончим комилки, ўзбек оилалари ўз фарзандларини Ўзбекистон билан таништириш — Самарқанд, Бухоро ва бошқа тарихий қадамжоларни кўрсатиш учун мамнуният билан олиб келишади».
Бундан ташқари, у таълим ва спорт туризми истиқболларини қайд этди.
«Бизда таълим туризми етарлича ривожланмаган. АҚШда бу формат яхши ишлайди. Биз аллақачон Канададан талабаларни олиб келганмиз — ўтган йилларда бу катта қизиқиш уйғотди. Ўйлайманки, таълим туризми, шунингдек, спорт туризми катта истиқболга эга».
Элчи тақдимот материаллари ва туристик таклифлар сифатига ҳам эътибор қаратди.
«Ўтган йили биз АҚШда 40 дан ортиқ туристик тадбирлар ўтказдик. Афсуски, туристик пакетлар ва тақдимот материаллари кўпинча сифатсиз, қолипга солинган ва мослаштирилмаган эди. Шу муносабат билан биз биргаликда ишлашга тайёрмиз. Элчихонанинг катта тажрибаси бор ва бу соҳада биз жуда кўп ишларни амалга оширишимиз мумкин».
Молиялаштириш ҳақида гапирар экан, у асосий эътиборни тарғиботга қаратишни таклиф қилди.
«Мен ушбу маблағларнинг катта қисмини айнан туризмни тарғиб қилиш ва ташвиқот ишларига йўналтиришни таклиф қилган бўлардим. Масалан, таниқли блогерларни таклиф қилиш керак».
Якунда Фурқат Сиддиқов халқаро медиаплатформалар билан ҳамкорлик ҳақида маълум қилди: «Ҳозирги вақтда биз National Geographic канали билан ишлаяпмиз ва бу йил канал жамоаси мамлакат ҳақида ҳужжатли сериал суратга олиш учун Ўзбекистонга келади».
Президентнинг 2025 йил 12 ноябрдаги фармонига мувофиқ, Ўзбекистон ватандошларнинг йирик диаспоралари тўпланган жойларни ҳисобга олган ҳолда АҚШда янги консулликлар очишни режалаштирмоқда — Филадельфия (Пенсильвания штати), Чикаго (Иллинойс), Орландо (Флорида) ва Сиэтл (Вашингтон). Уларнинг вазифаси, ватандошлар билан ишлашдан ташқари, икки мамлакат ҳамкорлигини кенгайтиришга кўмаклашишдан иборат бўлади.
2025 йил ноябрь ойида транспорт вазири ўринбосари Жасурбек Чориев Ўзбекистон АҚШ билан ўз фуқаролари ва бизнеси учун виза тартибларини соддалаштиришни муҳокама қилишини маълум қилган эди. У шунингдек, янги Boeing самолётлари сотиб олиниши билан парвозлар географиясини кенгайтириш, жумладан, Американинг бошқа шаҳарларига рейслар қўйиш режалаштирилаётганини айтиб ўтди.