Қўшни Қирғизистон Республикаси ҳудудида навбатдаги ер силкиниши қайд этилди. Зилзила ўчоғи Жалолобод шаҳри яқинига тўғри келиб, унинг таъсири Ўзбекистон Республикасининг чегарадош вилоятларида ҳам кузатилган.
Фавқулодда вазиятлар вазирлиги Сейсмопрогностик мониторинг Республика маркази маълумотларига кўра, табиат ҳодисаси 2026 йил 8 июль куни тунги соат 00:54 да юз берган. Ер силкинишининг магнитудаси 3,9 га тенг бўлиб, унинг манбаси 5 км чуқурликда жойлашган. Зилзила маркази Тошкент шаҳридан 291 км жанубий-шарқий йўналишда қайд этилган.
Ер қимирлаши Андижон ва Наманган вилоятларининг бир қисмида яшовчи аҳоли томонидан сезилган. Ҳудудлар кесимида силкиниш кучи қуйидагича кўриниш олди:
- Пахтаобод туманида — 2-3 балл (ўчоқдан 33 км узоқликда);
- Избоскан туманида — 2 балл (ўчоқдан 48 км узоқликда);
- Андижон туманида — 2 балл (ўчоқдан 49 км узоқликда);
- Қўрғонтепа туманида — 2 балл (ўчоқдан 50 км узоқликда);
- Хонобод шаҳрида — 2 балл (ўчоқдан 50 км узоқликда);
- Жалақудуқ туманида — 2 балл (ўчоқдан 51 км узоқликда);
- Учқўрғон туманида — 2 балл (ўчоқдан 51 км узоқликда);
- Андижон шаҳрида — 2 балл (ўчоқдан 54 км узоқликда).