Зилемхон Ҳайдарович Ҳайдаров Ўзбекистон теннис федерацияси раисининг ўринбосари этиб тайинланди. Бу ҳақида спорт ташкилоти матбуот хизмати 2025 йил 20 февраль куни маълум қилди.
У 23 йил (1993−2016) давомида Ўзбекистоннинг биринчи президенти Ислом Каримов девонининг бошқарувчиси лавозимида ишлаган, кейин эса Президент администрациясида (2016−2018) шу лавозимни эгаллаган. 2018 йил августидан буён Президент администрациясининг Молия-хўжалик департаменти раҳбари сифатида фаолият юритиб келмоқда.
2019 йилдан бери федерациянинг бош котиби лавозимида ишлаб келган Ирода Тўлаганова ҳам раис ўринбосари этиб тайинланди.
Ирода Тўлаганова (1982 й. т.) — Ўзбекистонда хизмат кўрсатган спортчи, WTAнинг етти турнири ғолиби. «Шуҳрат» медали ва «Ўзбекистон ифтихори» кўкрак нишони соҳиби. 2019 йил февраль ойидан Ўзбекистон теннис федерациясини бошқариб келган.
Федерациянинг бошқа раис ўринбосарлари этиб Нўмон Ўткирович Сатторов ва Азиз Шуҳратович Ҳамидов тайинланди. Азиз Ҳамидов аввал «Buyuk Kelajak»да эксперт ва Давлат инвестициялар қўмитасининг методология бўлимида етакчи мутахассис бўлиб ишлаган. Ҳозир у Инвестициялар, саноат ва савдо вазирлиги департаменти бошлиғи ҳисобланади.
Ташкилотнинг янги бош котиби Сардор Ботирович Комилов бўлди.
Эслатиб ўтамиз, 2025 йил 17 февраль куни «Капиталбанк» асосчиси, «Пахтакор» футбол клубининг собиқ президенти Ботир Раҳимов Ўзбекистон теннис федерацияси раиси этиб сайланган эди. У молия, суғурта, истеъмол моллари ишлаб чиқариш, қурилиш ва озиқ-овқат саноати соҳаларида фаолият юритувчи кўплаб компанияларнинг таъсисчиси ҳисобланади.
