Хитой Молия вазирлиги 2025 йил 10 апрелдан бошлаб АҚШдан олиб кириладиган барча товарларга 34% миқдорида қўшимча бож жорий этилишини эълон қилди, деб хабар бермоқда Reuters.
Шу тариқа Пекин АҚШ президенти Дональд Трамп томонидан жорий этилган барча мамлакатлардан олиб кириладиган товарларга нисбатан кенг кўламли божларга жавоб берди. Хитойга нисбатан тариф 34%ни ташкил этди, аммо аввалги тарифни ҳам ҳисобга олганда, АҚШга олиб кириладиган Хитой товарларига умумий бож миқдори 54%га етди.
Жавоб чоралари доирасида Хитой АҚШ ишлаб чиқарувчиларидан сорго, парранда гўшти ва суяк унларини импорт қилишни дарҳол тўхтатди.
Шунингдек, Пекин 2025 йил 4 апрелдан бошлаб АҚШга самарий, гадолиний, тербий, диспрозий, лютеций, скандий ва иттрий каби ўрта ва оғир ноёб ер элементларини экспорт қилишни назорат қилишини эълон қилди.
Бундан ташқари, Хитой Савдо Вазирлиги 16 та Америка компаниясини экспорт назорати рўйхатига киритди, бу эса Хитой компанияларига уларга икки томонлама қўлланилиши мумкин бўлган товарларни етказиб беришни тақиқлайди.
Яна 11 та АҚШ компанияси “ишончсиз ташкилотлар” рўйхатига киритилди, бу эса Хитойга уларга нисбатан жазо чоралари қўллаш имконини беради, деб ёзади Reuters.
Шу кунларда Хитой Савдо вазирлиги Трамп томонидан жорий этилган божларни қоралаб, жавоб чоралари кўрилишини маълум қилган эди. «Савдо урушларида ғолиб бўлмайди, протекционизм эса ҳеч қаерга олиб бормайди. Хитой АҚШни бир томонлама божларни дарҳол бекор қилишга ва савдо шериклари билан тенг асосда мулоқот орқали келишмовчиликларни ҳал этишга чақирмоқда», — дейилган вазирлик баёнотида.
