Ўзбекистон аэропортлари давлат оператори Uzbekistan Airports ва Саудия Арабистонининг Vision Invest компанияси бошчилигидаги халқаро консорциум Тошкентнинг янги халқаро аэропортини қуриш ва кейинчалик ундан фойдаланиш бўйича давлат-хусусий шериклик (ДХШ) тўғрисидаги битимни имзолади, деб хабар берди компания матбуот хизмати.
Ҳужжат 2026 йил 17 июнь куни Тошкент халқаро инвестиция форуми доирасида имзоланди. Консорциум таркибига Япониянинг Sojitz Corporation ва Жанубий Кореянинг Incheon International Airport Corporation компаниялари ҳам кирди.
Аввалроқ халқаро консорциумдаги улушлар қуйидагича тақсимлангани хабар қилинган эди: Vision Invest — 45%, Sojitz Corporation — 30%, Incheon International Airport Corporation — 15%, Uzbekistan Airports — 10%.
Битимни имзолашдан олдин тайёргарлик ишлари олиб борилди. Хусусан, халқаро молия институтлари талабларига мувофиқ экологик ва ижтимоий баҳолашлар ўтказилди, ДХШ тўғрисидаги битим ишлаб чиқилди, муҳандислик коммуникацияларини кўчириш бўйича лойиҳа ҳужжатлари тайёрланди, шунингдек, бўлажак аэропорт ҳудудини тайёрлаш ишлари бошланди.
«Аэропорт лойиҳаси мамлакат президенти ташаббуси билан Ҳукумат, Иқтисодиёт ва молия вазирлиги ҳамда Транспорт вазирлиги кўмагида ишлаб чиқилганини таъкидлаш муҳим. Бугун эса биз уни амалга ошириш йўлида муҳим қадам ташладик», — деди Uzbekistan Airports бошқаруви раиси Жавлонбек Умархўжаев.
Унинг сўзларига кўра, Тошкентнинг янги халқаро аэропорти йўловчи ва юк ташиш соҳасидаги ортиб бораётган эҳтиёжларни ўнлаб йиллар олдинга таъминлашга қодир замонавий, юқори технологик авиация хабига айланиши керак.
«Етакчи халқаро компаниялар билан шериклик туфайли биз нафақат инвестицияларни, балки энг янги технологиялардан фойдаланган ҳолда дунёдаги энг йирик аэропорт мажмуаларини лойиҳалаш, қуриш ва бошқариш бўйича ноёб тажрибани ҳам қўлга киритмоқдамиз. Ишончим комилки, ушбу лойиҳа Ўзбекистон авиация тармоғи ривожланишининг янги босқичи бўлади ва мамлакатимизнинг Марказий Осиёдаги асосий транспорт хаби сифатидаги мавқеини мустаҳкамлайди», — дея қайд этди.
Аэропорт Тошкент вилоятининг Ўрта Чирчиқ ва Қуйи Чирчиқ туманлари ҳудудидаги 1310 гектар майдонда жойлашади.
Биринчи босқичда узунлиги 4 километрдан бўлган иккита учиш-қўниш йўлаги, майдони 208 минг квадрат метрлик йўловчи терминали, ҳаво кемалари учун 98 та тўхташ жойи, ёнилғи қуйиш мажмуаси ва ҳаво ҳаракатини бошқаришнинг замонавий диспетчерлик минорасини қуриш режалаштирилган.
Қурилиш ишларини 2026 йилнинг июль ойида бошлаш мўлжалланмоқда. Аэропортни фойдаланишга топшириш 2030 йилнинг охирига мўлжалланган. Ишга туширилганидан сўнг у йилига 20 миллион нафаргача йўловчи ва 300 минг тоннагача юкка хизмат кўрсатиш имкониятига эга бўлади.
Битимга кўра, хусусий шериклар консорциуми йўловчи терминали ва вокзал олди майдонини қуриш ҳамда кейинчалик бошқариш мажбуриятини ўз зиммасига олади. Давлат шериги ихтиёрида эса аэродром мажмуасини қуриш ва ундан фойдаланиш қолади.
Тасдиқланган графикка мувофиқ, июнь ойидаёқ муҳандислик тармоқларини кўчиришга киришиш, ҳудудни тайёрлашни якунлаш ва босқичма-босқич қурилиш ишларини бошлаш режалаштирилган.
Пойтахтнинг янги аэропорти қурилиши президентнинг 2025 йил 25 ноябрдаги қарори (ПҚ-353) билан кўзда тутилган.
Эслатиб ўтамиз, янги аэропортга Тошкент — Самарқанд, Тошкент — Андижон ва Тошкент — Бўстонлиқ пуллик автомобиль магистраллари ўтказилади, шунингдек, тезюрар поезд йўлга қўйилади. Тошкент ва Янги Тошкент марказлари ўртасида шаттл-транспортлар ҳаракати ташкил этилади.