Тошкент тўй палови давлат реестрига географик кўрсаткич сифатида киритилди, деб хабар берди Ўзбекистон Адлия вазирлиги матбуот хизмати.
Географик кўрсаткич — бу маҳсулотнинг муайян ҳудудга тегишли эканлигини ҳамда унинг ўзига хос хусусиятлари айнан ушбу жой билан боғлиқлигини тасдиқловчи интеллектуал мулк объекти.
«Тарихий ва этнографик манбаларга кўра, Тошкент воҳасида палов тайёрлаш маданияти асрлар давомида шаклланган. Тўй палови шунчаки таом эмас, балки кимё, физика ва биология қонуниятлари акс этган мураккаб жараён», — дейилади хабарда.
Реестрга киритилиши «Тошкент тўй палови» номи ва уни тайёрлашнинг анъанавий технологияси ҳуқуқий ҳимоя қилинишини таъминлайди.