Транспорт вазирлиги Сенатнинг Бюджет ва иқтисодий масалалар қўмитаси раиси Эркин Гадоевнинг Тошкентдаги тирбандликларни камайтириш, «Интеллектуал транспорт» тизимини жорий этиш ва жамоат транспортини ягона агломерацион тизимга интеграция қилиш бўйича чора-тадбирлар ҳақидаги сўровига жавоб юборди. Ушбу жавоб Сенат томонидан эълон қилинди.
Ҳужжатда қайд этилишича, президент раҳбарлигида 2025 йил 9 июль куни видеоселектор йиғилиши бўлиб ўтган, унда тирбандликларнинг олдини олиш ва жамоат транспортини ривожлантириш бўйича топшириқлар берилган. Уларга кўра кенг кўламли ишлар олиб борилмоқда, дейилади Транспорт вазирлиги хабарида.
Тошкентда тирбандликларга қарши курашиш чоралари
Пойтахт учун 1004 та автобус, шу жумладан 304 та электробус, 500 та 12 м узунликдаги ва 200 та 18 м узунликдаги автобуслар сотиб олинди. Шундай қилиб, пойтахт автопаркининг умумий сони 1847 тани ташкил этди.
Автобус йўналишлари тармоғи қайта ишланди, тўрт турдаги 164 та йўналиш жорий этилди: 99 та боғловчи, 14 та ҳалқа, 11 та магистрал ва 40 та етказувчи.
Транспорт вазирлиги маълумотларига кўра, автобуслардан атмосферага чиқарилаётган зарарли моддалар миқдори ойига 93,3 тоннага камайди. Автобусларда ташиладиган кунлик йўловчилар сони 2,2 баробар ошиб, 1,4 млн кишига етди (Транспорт вазирлиги таққослаш қайси давр билан келтирилганига аниқлик киритмаган). Вазирликнинг таъкидлашича, бунинг натижасида 142 мингга яқин киши шахсий автомобил ва таксидан фойдаланишдан воз кечган.
Тирбандликларни камайтириш, жамоат транспортининг жозибадорлигини ошириш ва унинг устуворлигини таъминлаш мақсадида пойтахтнинг 36 та транспорт коридорида (73 та кўча, 472 км) комплекс чора-тадбирлар амалга оширилмоқда. Шу жумладан Шота Руставели – Шаҳрисабз – Янги Сергели ва Амир Темур кўчаларини ўз ичига олган, умумий узунлиги 125 км бўлган 13 та энг тиғиз транспорт коридори реконструкция қилинмоқда.
Шаҳарнинг умумий узунлиги 79,4 км бўлган 31 та кўчасида махсус ажратилган «А» ҳаракатланиш йўлаклари ташкил этилди. Автобусларнинг ўртача эксплуатацион тезлиги 18,7 км/соатдан 24,1 км/соатгача, яъни 29 фоизга ошди.
«Интеллектуал транспорт» тизимини жорий этиш
Бутун мамлакат бўйлаб светофорларни мувофиқлаштирилган бошқарув тизимини жорий этиш ишлари олиб борилмоқда.
Хусусан, Тошкентда транспорт оқимларини самарали бошқариш мақсадида Навоий, Беруний, Фарҳод, Келес йўли кўчаларида, Тошкент ҳалқа автомобиль йўлининг 3 км лик қисмида ва Оҳангарон йўлида масофадан бошқариладиган светофорлар ўрнатилди, шунингдек, транспорт оқимларини ва йўл ҳаракати қоидалари бузилишларини қайд этиш тизимлари жорий қилинди.
Жамоат транспортини ягона агломерацион тизимга интеграция қилиш
Автобус йўналишларини шаҳар атрофидаги ҳудудларга кенгайтириш режалари ишлаб чиқилди. Биринчи босқичда 10 та автобус йўналишини узайтириш ва битта янги йўналишни очиш назарда тутилган. Келес шаҳрини Тошкентдаги Чорсу бозори билан боғловчи 177-сонли йўналиш аллақачон ишга туширилган.
2025 йил октябрь ойида 200 та янги 12 метрли электробус олиб келиниши кутилмоқда. Бундан ташқари, 2026 йилда Тошкентга яна 1000 та автобус (30 та ўта катта сиғимли (18 м), 500 та катта сиғимли (12 м) ва 470 та ўртача сиғимли (9 м)) етказиб берилади. Бу автобуслар Тошкент ва унга туташ ҳудудлар ўртасидаги 48 та йўналиш бўйича брутто-шартномалар асосида ҳаракатланади.
Кўрсатилган чора-тадбирлар амалга оширилиши натижасида:
- Тошкентдаги автобусларнинг умумий сони 2891 тани ташкил этади;
- рейснинг ўртача давомийлиги тахминан 30 дақиқа;
- йиллик йўловчи оқими 750 миллион кишига етади.
Тунги йўналишлар
Президентнинг 2022 йил 30 апрелдаги қарорига кўра, Тошкентда аэропорт, вокзаллар, метро станциялари, савдо марказлари, йирик корхоналар, ётоқхоналар ва шифохоналарни боғлайдиган 15 та тунги йўналишни ишга тушириш режалаштирилган. Автобусларнинг иши 22:00 дан 06:00 гача ташкил этилади, жами 54 та автобус линияга чиқади.
