Тошкентда янги техник университет – Tashkent Tech ташкил этилади. Янги олий ўқув юрти Boston Consulting Group кўмагида Тошкент давлат техника университети негизида босқичма-босқич ривожлантирилади. Бу ҳақда Ўзбекистон президентининг ёрдамчиси Саида Мирзиёева хабар берди.
“Бизнинг стратегик вазифамиз – энг юқори халқаро стандартларга жавоб берадиган янги авлод университетини яратиш. Биз замонавий меҳнат бозорининг энг юқори талабларига жавоб берадиган муҳандисларни тарбиялайдиган экотизимни шакллантирамиз”, – деб ёзди Саида Мирзиёева ўз Telegram-каналида.
Қайд этилишича, ушбу лойиҳа президент топшириғи ижроси доирасида амалга оширилмоқда ва ёшлар ўртасида техника таълимининг нуфузини оширишга қаратилган.
Эслатиб ўтамиз, 2024 йил 20 июндаги видеоселектор йиғилишида давлат раҳбари ҳар бир вилоятда техника олий ўқув юрти ва муҳандислик мактабларини ташкил этиш бўйича топшириқ берган эди. Ҳозирги кунга қадар Термиз, Андижон ва Қарши шаҳарларида техник университетлари, шунингдек, 8 та муҳандислик мактаби очилди.
2025 йил январь ойида бўлиб ўтган йиғилишда Нукус, Бухоро, Фарғона ва Наманган шаҳарларида техник университетларини ташкил этиш бўйича лойиҳалар тақдим этилган эди. Ушбу лойиҳалар доирасида янги йўналишлар очиш, хорижий дастурларни жорий этиш, талабаларнинг илмий-инновацион ишлардаги иштирокини кенгайтириш ва олий ўқув юртларига саноат ҳамкорларини жалб қилиш кўзда тутилган.
Умуман олганда, 35 та таълим муассасасини йириклаштириш ҳисобига 22 та техник университетини ташкил этиш режалаштирилган. Йил охиригача яна 17 та муҳандислик мактабини очиш мўлжалланган.
Халқаро бошқарув консалтинг компанияси Boston Consulting Group Ўзбекистонда 2017 йилдан буён фаолият юритади, 2022 йилдан буён Тошкентда офиси мавжуд. Компания тоғ-кон, нефть-газ, кимё, транспорт-логистика, қишлоқ хўжалиги соҳаларида бир қатор лойиҳаларни амалга оширган.
