«Капиталбанк» асосчиси, «Пахтакор» футбол клубининг собиқ президенти Ботир Раҳимов Ўзбекистон Теннис Федерацияси раиси этиб сайланди. Давлат божхона қўмитаси раиси Акмалхўжа Мавлонов Енгил атлетика федерацияси, Ўзбекистон Миллий Банки раҳбари Алишер Мирсоатов эса Қишки спорт турлари ассоциациясини бошқаришга тайинланди.
2025 йил 17 февраль куни Миллий олимпия қўмитасида уч спорт федерациясининг навбатдан ташқари сайлов конференциялари бўлиб ўтди. Мазкур тадбирларда Спорт вазирлиги вакиллари ва Миллий Олимпия қўмитасининг биринчи ўринбосари Отабек Умаров ҳам иштирок этди, деб хабар қилди Спорт вазирлиги матбуот хизмати.
Енгил атлетика федерациясининг раиси этиб Давлат божхона қўмитаси раиси Акмалхўжа Мавлонов сайланди.
Федерация раҳбарининг ўринбосарлари Отабек Чориев, Андрей Абдувалиев ва Камолиддин Усмонов, бош котиб лавозимларини Камолиддин Рўзмуҳаммедовлар эгаллашди.
Қишки спорт турлари ассоциациясини Ўзбекистон Миллий банки (НБУ) бошқаруви раиси Алишер Мирсоатов бошқаришга тайинланди, у бугунга қадар Теннис Федерациясини бошқарган.
Янги Теннис Федерацияси раҳбари этиб, «Пахтакор» футбол клубининг собиқ президенти ва 2001 йили «Капиталбанк»ка асос солган тадбиркор Ботир Икромжонович Раҳимов сайланди. У, шунингдек, молия, суғурта, истеъмол маҳсулотларини ишлаб чиқариш, қурилиш ва озиқ-овқат саноатида фаолият юритаётган бир неча компаниянинг асосчиси ҳисобланади.
Барча янги сайланган раҳбарлар олдида 2026 йили Милан ва Кортина-д’Ампеццо шаҳарларида бўлиб ўтиши режалаштирилган Қишки Олимпия ўйинлари ва 2028 йили Лос-Анджелесда бўлиб ўтадиган Ëзги Олимпия ўйинларига тайёргарлик кўриш бўйича устувор вазифалар белгиланди.
