Сурхондарё вилоятидаги “Сариосиё” минтақавий аэропорти реконструкцияси якунланди. 2025 йил 29 апрель куни мазкур аэропорт SilkAvia авиакомпаниясининг ATR-72−600 учоғи билан биринчи техник парвозни қабул қилди. Бу ҳақида Uzbekistan Airports матбуот хизмати хабар берди.
Аэропортда аэродром сунъий қопламаларининг капитал таъмирлаш ишлари олиб борилди. Хусусан, учиш-қўниш йўлагининг 1550 метр узунликдаги ва 35 метр кенгликдаги қисми икки қатламли асфальтобетон билан мустаҳкамланди. Шунингдек, қайрилиб олиш йўлаги ва икки дона ATR-72−600 русумли самолётлар учун тўхтаб туриши учун перрон таъмирланди.
“Сариосиё” аэропорти аэродром мажмуаси 1976 йилдан буён эксплуатация қилиб келинаётган учиш-қўниш йўлагининг эскириши ҳамда ATR-72 ва ундан пастроқ классдаги самолётларни хавфсиз қабул қилиш ва учириш талабларига жавоб бериш мақсадида капитал таъмирлашга муҳтож эди. Техник парвоз аэродромнинг самолётларни қабул қилиш ва учиришга тўлиқ тайёрлигини кўрсатди”, — дейилади Uzbekistan Airports ахборотида.
Ҳозирда 100 нафар йўловчини қабул қилиш қувватига эга янги терминал қурилиши якунланмоқда. Барча ишлар якунланганидан сўнг, бир ой ичида мунтазам рейсларни амалга ошириш режалаштирилмоқда.
“Сариосиё” сўнгги йилларда қайта фаолият бошлаган бешинчи минтақавий аэропорт бўлди. Бундан аввал Мўйноқ, Қўқон, Шаҳрисабз ва Замин аэропортлари реконструкция қилиниб, қайта ишга туширилган эди.
