Қашқадарё вилоятининг Қамаши туманида 2026 йил 4 июнь куни муассасага тегишли автомобилда унутиб қолдирилган оилавий боғчанинг 3 ёшли тарбияланувчиси вафот этди. Бу ҳақда Ўзбекистон Мактабгача ва мактаб таълими вазирлиги матбуот котиби Дилфуза Собирова маълум қилди.
Фожиадан сўнг боғчани очган тадбиркор О. А. билан тузилган шартнома бекор қилинган, дея қайд этди у.
Бош прокуратура матбуот котиби Ҳаёт Шамсутдинов Жиноят кодексининг 116-моддаси (касб юзасидан ўз вазифаларини лозим даражада бажармаслик) бўйича жиноят иши қўзғатилганини маълум қилди. Иш доирасида 5 июнь куни гумонланувчи — автомобиль ҳайдовчиси қўлга олинган.
Дилфуза Собирова болаларни таълим муассасаларига хавфсиз етказиш ота-оналарнинг «энг муҳим ва асосий вазифаси» эканини таъкидлади.
«Сизлардан фарзандларингизнинг таълим муассасаларига хавфсиз келиб-кетишини ўзингиз таъминлашингизни, уларнинг саломатлигига доимо ғамхўрлик қилишингизни сўраймиз», — деб ёзди.
2025 йили Қашқадарёнинг Косон туманида хусусий боғчанинг 2 ёшли тарбияланувчиси ҳам мудира уни қулфланган машинада тахминан 6 соат давомида қолдириб кетгани сабабли вафот этган эди. Суд уни 3 йилга озодликдан маҳрум қилиш жазосига ҳукм қилган.