Ўзбекистоннинг Монакодаги Париж қароргоҳли биринчи элчиси Нодир Ғаниев 7 октябрь куни Князь Альбер II га ишонч ёрлиқларини топширди, деб хабар берди «Дунё» АА.
Монако Князи Ўзбекистоннинг қайта тикланувчи энергия манбалари соҳасидаги кенг кўламли лойиҳаларига қизиқиш билдирди, мамлакатнинг «яшил» иқтисодиётга ўтиш йўлидаги саъй-ҳаракатларини ва 2030 йилгача электр энергиясининг 54%ни қайта тикланувчи манбалардан ишлаб чиқариш бўйича қўйилган улкан мақсадини юқори баҳолади.
У Ўзбекистонни 2025 йил октябрь-ноябрь ойларида Самарқандда ЮНЕСКО Бош конференциясининг 43-сессиясини ўтказиши билан табриклади.
Элчи ўз навбатида Ўзбекистон ва Монако ўртасидаги муносабатларни ривожлантириш учун барча зарур саъй-ҳаракатларни амалга оширишини билдирди.
Икки давлат ўртасидаги дипломатик муносабатлар 2013 йил 29 ноябрда ўрнатилган. Ватикандан кейин дунёдаги катталиги бўйича иккинчи кичик давлат бўлган Монако Князлиги Ғарбий Европада, Франциянинг жанубида жойлашган.
2024 йил июль ойида Нодир Ғаниев Ўзбекистоннинг Франциядаги элчиси этиб тайинланган ва 2024 йил сентябрда Президент Эммануэл Макронга ишонч ёрлиқларини топширган эди. Жорий йилнинг май ойидан буён дипломат мамлакатнинг Португалиядаги элчиси сифатида ҳам фаолият юритмоқда.
