Туркиянинг Ўзбекистондаги янги элчиси этиб Уфук Улуташ тайинланди. Ташқи ишлар вазири Бахтиёр Саидов ундан ишонч ёрлиқлари нусхаларини қабул қилди.
«Туркиянинг Ўзбекистонда янги тайинланган элчиси Уфук Улуташдан ишонч ёрлиқлари нусхаларини қабул қилдик. Ўзбекистон ва Туркия нафақат икки томонлама даражада, балки минтақавий ҳамкорликни кенгайтириш йўналишида ҳам фаол ҳамкорликни давом эттирмоқда. Биргаликдаги саъй-ҳаракатларимиз ҳар икки мамлакатнинг ривожланиши ва фаровонлигига хизмат қилишига ишончимиз комил», — деб ёзди Ўзбекистон Ташқи ишлар вазири.
Уфук Улуташ 1980 йилда Искендерунда туғилган. У Билькент университетида сиёсатшунослик бўйича бакалавр, Огайо штат университетида тарих бўйича магистр ва Анқара ижтимоий фанлар университетида халқаро муносабатлар бўйича докторлик даражасини олган. Яҳудий университетида иврит тили ва Яқин Шарқ сиёсатини ўрганган.
2013–2018 йилларда у АҚШдаги SETA фонди (Сиёсий, иқтисодий ва ижтимоий тадқиқотлар таҳлил маркази) ташқи сиёсат бўйича директори лавозимида фаолият юритган, шунингдек, Анқара ижтимоий фанлар университетида халқаро муносабатлар кафедрасида дарс берган. Бундан ташқари, TRT телеканалида ташқи сиёсат бўйича дастур тайёрлаган ва олиб борган.
Улуташ аввал Туркиянинг Ватикандаги элчиси ва Туркия ташқи ишлар вазирлигининг Стратегик тадқиқотлар маркази директори лавозимларида ишлаган (2018–2023).
2025 йил февраль ойи бошида Туркия президенти Режеп Таййип Эрдўған уни Тошкентга элчи этиб тайинлади.
2021–2025 йилларда Туркиянинг Тошкентдаги элчиси лавозимида Олган Бекар фаолият юритган.
