2025 йил 1 июлдан бошлаб Ўзбекистонда йўловчилар мамлакат ичидаги рейсларга шахсни тасдиқловчи ҳужжатларнинг электрон версиялари ёрдамида рўйхатдан ўтишлари мумкин, дея хабар берди Uzbekistan Airports матбуот хизмати.
Ушбу санадан бошлаб бир қатор ҳужжатларнинг, жумладан паспорт ва ҳайдовчилик гувоҳномасининг рақамли версиялари қоғоз шаклидагилари билан тенг равишда тан олинади. Улар MyGov (Ягона интерактив давлат хизматлари портали) ва «Ижтимоий карта» (ишлаб чиқилмоқда) иловаларида мавжуд.
Электрон нусхаларни давлат органларида, банкларда ва бошқа ташкилотларда, шунингдек, аэропортлар ва вокзалларда тақдим этиш мумкин.
Uzbekistan Airports аэропортда бу қандай ишлашини тушунтирди. Йўловчи рўйхатдан ўтишдан олдин давлат хизматлари порталидаги шахсий ҳисоб қайдномасига, MyGov ёки «Ижтимоий карта» иловасига кириши, шахсий маълумотлар саҳифасига ўтиши ва шахсни тасдиқловчи ҳужжатни электрон шаклда рўйхатдан ўтиш жойидаги ходимга кўрсатиши керак.
Uzbekistan Airways компанияси ўзгаришлар кучга кирганини тасдиқлади.
Муҳим: Рўйхатдан ўтишда паспорт (ID-карта) нусхалари, фотосуратлари, сканлари ёки шахсий маълумотлар саҳифасининг скриншотлари қабул қилинмайди. Текшириш учун Ягона интерактив давлат хизматлари порталидаги шахсий кабинетга фаол кириш имконияти керак.
Электрон ҳужжатларни қандай тақдим этиш керак?
MyGov: Davlat xizmatlari иловасида электрон ҳужжатлардан қандай фойдаланиш бўйича қисқача йўриқнома асосий расмда келтирилган. У Google Play ва AppStore дўконларида мавжуд.
Кириш учун OneID ва MyID сервисларидан фойдаланиш керак. Илова тўрт хонали пин-код ўрнатишни сўрайди. У оддий бўлмаслиги керак, чунки иловада фойдаланувчининг шахсий маълумотлари мавжуд.
Иловага киргандан сўнг, экраннинг пастки ўнг қисмидаги «Профиль» тугмасини босиш керак. Фойдаланувчининг электрон ҳужжатлари ва гувоҳномалари саҳифаси очилади. У ерда нафақат ID-картани, балки хорижга чиқиш паспорти ва ҳайдовчилик гувоҳномасини ҳам топиш мумкин (ҳужжатлар бўлимини чапга ёки ўнгга суриш керак).
Электрон ҳужжатни босганда, у тўлиқ экранда очилади. Ҳужжатни талаб бўйича тақдим этиш учун «Тақдим этиш» тугмасини босиш керак – электрон ҳужжат остида сканерлаш учун QR-код пайдо бўлади.
Шуни таъкидлаш жоизки, хавфсизлик мақсадида бу QR-коднинг фойдаланиш муддати чекланган. У 5 мартагача янгиланиши мумкин, сўнгра сўровлар чегарасига етилганини хабар қилади, шунинг учун «Тақдим этиш» тугмасини тўғридан-тўғри тақдим этиш пайтида босган маъқул. Бундан ташқари, илова хавфсизлик мақсадида QR-кодли электрон ҳужжат саҳифасининг скриншотини олишга рухсат бермайди.
