Ўзбекистон Президенти Шавкат Мирзиёев 2025 йил 24 сентябрь куни Америка университетларида таҳсил олаётган «Эл-юрт умиди» жамғармаси стипендиатлари ва ватандошлар билан учрашувда АҚШ президенти Дональд Трамп билан учрашуви якунларига изоҳ берди.
«Хабарингиз бор, 2025 йил 5 сентябрь куни Америка томонининг таклифига биноан жаноб Трамп билан жуда мазмунли суҳбатимиз бўлиб ўтганди. Суҳбат жараёнида у: «Биз албатта учрашамиз. Мен Ўзбекистон ҳақида билардим, аммо бунчалик кам билишимни ўйламаган эканман», — дея қайд этди давлат раҳбари («Ўзбекистон 24» телеканали сюжетидан иқтибос).
Президент олдинги куни «жуда яхши учрашув» бўлиб ўтганини ва унда кўплаб масалалар бўйича келишувларга эришилганини маълум қилди.
«Twitter’да ёзилган гапларни сиз ҳам ўқигандирсиз. Биз ўзбек халқи айтган гапини бажаришини исботладик», — деди.
Шавкат Мирзиёев музокаралар мамлакат учун янги истиқболларни очишини таъкидлади. «Битта нарсани билинг: кечаги тарихий учрашувларимиз сизлар учун эртага кўплаб имкониятларни очади», — деди.
Президент хорижий ҳамкорларнинг қизиқиши Ўзбекистоннинг потенциали билан боғлиқлигини қайд этди.
«Улар бизга нега қизиқиш билдиряпти? Чунки имкониятларимиз жуда катта. Агар ҳамкорлар билан биргаликда юқори қўшилган қийматга эга, рақобатбардош маҳсулот ишлаб чиқарсак, албатта бозор топамиз», — дея таъкидлади.
Ўзбекистон Президенти 2025 йил 23 сентябрь куни Нью-Йоркда АҚШ президенти билан учрашган эди. Дональд Трамп Америка маҳсулотлари, жумладан 22 та Boeing 787-9 Dreamliner самолётларини «катта ҳажмда сотиб олгани» учун миннатдорчилик билдирди: «105 миллиард доллар — бу жуда ёмон эмас». Шавкат Мирзиёев АҚШ раҳбарининг дунёдаги қатор зиддиятларни ҳал этишдаги хизматларини қайд этди ва уни Ўзбекистонга таклиф қилди.
АҚШ бизнеси билан учрашувда Шавкат Мирзиёев мамлакатда Америка компанияларининг муваффақиятли ишлашига шахсан кафолат беришини маълум қилди. Инвесторларнинг лойиҳаларини кузатиб бориш учун Инвестициялар вазирлигида АҚШ масалалари бўйича вазир ўринбосари лавозими жорий этилди.
«Давра суҳбати» якунлари бўйича Ўзбекистон вазирликлари ва компаниялари Американинг Boeing, Citigroup, Cleveland Clinic, Oppenheimer ва қатор бошқа ҳамкорлар билан келишувлар имзолади. Ҳужжатлар транспорт, тоғ-кон саноати, энергетика, соғлиқни сақлаш ва юқори технологияларни қамраб олади.
