ChatGPT чат-боти, Sora видео яратувчи ва DALL-E тасвирлар генерацияси нейротармоқларини ишлаб чиққан америкалик OpenAI LLC компанияси Ўзбекистонда қўшилган қиймат солиғи (ҚҚС) тўловчиси сифатида рўйхатдан ўтди. Бу ҳақида Солиқ қўмитаси маълумотларида қайд этилган.
Компания 2025 йил 8 апрель куни рўйхатдан ўтди. Интернетдаги маълумотларга кўра, OpenAI LLC ўзининг пулли обунасининг нархини 12% га ошириб, 22,39 долларга етказган (олдинги нархи — 19,99 АҚШ доллари). Айрим фойдаланувчиларда ҳозирча эски нарх сақланиб турибди.
Сўнгги ойларда ChatGPT чат-боти Ўзбекистонда энг кўп юклаб олинган дастурлардан бирига айланган.
2025 йил 7 апрель куни АҚШда жойлашган DigitalOcean булутли хизмат кўрсатувчи провайдер ҳам ҚҚС бўйича рўйхатдан ўтди.
2025 йил 4 апрелда россиялик ivi.ru компанияси (ООО «Иви.ру»), худди шу номдаги онлайн-кинотеатрни бошқарадиган ташкилот, солиқ тўловчилар рўйхатига киритилди.
Солиқ қўмитаси маълумотларига кўра, ҳозирги кунда Ўзбекистонда 67 та хорижий интернет-компания рўйхатдан ўтган, шундан 7 таси 2025 йил бошидан буён. Янги иштирокчилар орасида Швейцариядаги eBay тузилмаси ва Alibaba Cloud булутли хизмати ҳам бор.
Meta, Google, Apple ва Netflix каби хорижий интернет-компаниялар 2024 йилда Ўзбекистондаги даромадларини 1,5 баробарга оширган — қарийб 1 трлн сўмгача. Улар жами 115,8 млрд сўм солиқ тўлаган. ҚҚС бўйича энг катта улуш Metaга тўғри келади, мамлакатда блокланган Tiktok эса 900 млн сўмдан ортиқ солиқ тўлаган.
