Президент Шавкат Мирзиёев 2025 йил 27 март куни Ўзбекистон Республикасининг Жиноят кодексининг 244-моддаси (оммавий тартибсизликлар)га ўзгартишлар киритиш тўғрисидаги қонунни имзолади, деб хабар қилди Адлия вазирлиги.
Амалдаги қонунчилик оммавий тартибсизликларни ташкил этиш, уларда фаол иштирок этиш ва фуқароларга нисбатан зўравонлик қўллаш учун жиноий жавобгарликни назарда тутади.
Ҳужжатда оммавий тартибсизликлар уюштириш мақсадида ўқув курсларини ўташ ва уларни ташкил этишни молиялаштириш учун жиноий жавобгарлик белгиланди.
Оммавий тартибсизликларни уюштириш мақсадида ўқув курсларини ўташ, жумладан, назарий билимларга, амалий кўникмаларга эга бўлиш, қурол-яроғ, портловчи, заҳарли ёки бошқа хавфли моддалар ва предметлардан фойдаланиш усулларини ўзлаштириш учун 300 дан 600 тагача базавий ҳисоблаш миқдори (112,5 млн сўмдан 225 млн сўмгача) миқдорида жарима, 3 йилгача тузатиш ишлари ёки 5 йилдан 7 йилгача озодликдан маҳрум қилиш жазоси белгиланди.
Шунингдек, ушбу модданинг мазкур қисми бўйича жиноят содир этган шахс ўз хоҳиши билан ҳокимият органларига режалаштирилаётган тартибсизликлар ҳақида хабар берса, содир этилган жиноятни фош этишга кўмаклашса, шунингдек, таълим олган, таълим ташкил қилган, ўтказган ёки молиялаштирган бошқа шахсларни аниқлашга, шунингдек, унинг ўтказилган жойини белгилашга фаол ёрдам берса, агар унинг ҳаракатларида бошқа жиноят таркиби мавжуд бўлмаса, жиноий жавобгарликдан озод этилади.
Бундан ташқари, 244-модданинг 2-қисмига молиялаштириш бўйича қўшимча киритилди. Хусусан, шахсга нисбатан зўравонлик, талон-тарож қилиш, ёқиб юбориш, мол-мулкка шикаст етказиш ёки уни йўқ қилиш, ҳокимият вакилига қурол ёки қурол сифатида ишлатиладиган бошқа предметлардан фойдаланиш ёки уларни ишлатиш билан таҳдид қилиш орқали қаршилик кўрсатиш билан боғлиқ оммавий тартибсизликларни ташкил этиш ёки молиялаштириш, шунингдек, уларда фаол иштирок этиш учун 10 йилдан 15 йилгача озодликдан маҳрум қилиш жазоси белгиланди.
Қонун лойиҳасининг изоҳ хатида «замонавий реалликларни ҳисобга олган ҳолда, ушбу соҳада миллий қонунчиликни такомиллаштириш зарурати туғилгани» қайд этилган.
Миллий гвардия маълумотларига кўра, қўшни мамлакатларда содир бўлган оммавий тартибсизликларда уларнинг ташкилотчилари махсус тайёргарликдан ўтган, шунингдек, мазкур тартибсизликларни молиялаштириш ҳолатлари аниқланган.
Хорижий давлатларнинг (Россия, Беларусь ва бошқалар) жиноят қонунчилигини ўрганиш шуни кўрсатдики, оммавий тартибсизликларни ташкил этиш мақсадида ўқув курсларини ўташ ва уларни молиялаштириш учун алоҳида жавобгарлик белгиланган.
Қонун 2025 йил 27 мартдан кучга кирди.
