Тошкент метрополитени ижтимоий тармоқларда тарқалган «Москва» русумли поезднинг бир бекатдан эшиги очиқ ҳолатда ҳаракатланиб ўтгани акс этган видео юзасидан изоҳ берди.
Хабарда айтилишича, ушбу ҳолат 2026 йил 14 апрель куни тахминан соат 12:53 да 34-сонли ҳаракат таркиби билан содир бўлган. «Алишер Навоий» бекатидан жўнаб кетиш вақтида машинист эшикларни ёпиш буйруғини берган, бироқ учинчи вагоннинг биринчи эшиги тўлиқ ёпилмай қолган.
«Ўзбекистон» бекатига етиб келгач, йўловчилар вагондан туширилган ва таркиб техник кўрик йўлагига юборилган.
Метро маъмурияти томонидан хизмат текшируви тайинланган бўлиб, унинг натижаларига кўра машинистга нисбатан интизомий чоралар кўрилиши мумкин.