Тошкент, Самарқанд ва Андижон шаҳарларида ихтисослаштирилган мактаблар ва мактаб-интернатларда таҳсил олаётган ногиронлиги бўлган болалар учун имтиёзли такси хизмати бўйича пилот лойиҳаси ишга туширилди. Бу ҳақда компания хабар берди. Лойиҳа Ижтимоий ҳимоя миллий агентлиги томонидан Yandex Uzbekistan билан ҳамкорликда амалга оширилмоқда.
Лойиҳа доирасида ногиронлиги бўлган ўқувчилар таксида ўқув муассасасига бориб келишлари мумкин бўлади. Давлат транспорт харажатларини ҳар бир бола учун ойига 1,2 базавий ҳисоблаш миқдоригача (450 минг сўм) қоплаб беради. Компенсация имтиёз бериш шартларига қараб, сафар нархининг 60 ёки 100 фоизигача қоплаши мумкин.
“Биз соғлиғидан қатъи назар, ҳар бир боланинг таълим ва ижтимоий ҳаётга тенг ҳуқуқли бўлиши учун шарт-шароитлар яратиш бўйича изчил иш олиб бормоқдамиз. Ушбу лойиҳа шунчаки ҳаракатланиш масаласини ҳал қилиш эмас. Бу оилаларнинг ишончини мустаҳкамлаш, ҳаёт сифатини ошириш ва ногиронлиги бўлган болаларнинг таълим жараёнида ва жамият ҳаётида тўлақонли иштирокини таъминлашга қаратилган муҳим қўллаб-қувватлаш чорасидир”, — таъкидлади Ижтимоий ҳимоя миллий агентлиги.
Сафарларни Yandex Go мобил иловаси орқали буюртма қилиш мумкин, улар “Комфорт” тарифи асосида амалга оширилади. Буюртма расмийлаштириш жараёнида махсус опциялар мавжуд — масалан, “Ногиронлик аравачаси билан бўламан” ёки “Машина топишга ёрдам беринг”. Ҳайдовчи хабарнома олади ва ёрдам беришга тайёр бўлади.
Компания Yandex Go буюртмалардан даромад олмайди, давлат томонидан қопланадиган барча маблағлар тўғридан-тўғри ҳайдовчиларга ўтказилади. Сервис томонидан бундай буюртмалардан комиссия ундирилмайди.
“Технологиялар ёрдамида биз одамларнинг бирор муаммосини ҳал қила оладиган ёки имконият ярата оладиган жойларда маҳсулот ва хизматлар яратамиз. Шаҳар инфратузилмасини яхшилаш ва унинг барча учун қулайлигига ҳисса қўшиш айнан шу қадриятларимизга мос келади”, — деди Yandex Uzbekistan раҳбари Иззат Шукуров.
Мустақил ҳаракатланишда қийинчиликларга дуч келадиган ногиронлиги бўлган болалар, масалан, кўриш қобилияти чекланган, таянч-ҳаракат аппарати касалликлари ёки ақлий заифликнинг оғир шаклларига эга бўлган болалар лойиҳа иштирокчиси бўлишлари мумкин.
Имтиёзлар беришнинг батафсил шартлари 2025 йил 28 февралдаги “Алоҳида таълим эҳтиёжлари бўлган болаларнинг таълим шароитларини яхшилаш тўғрисида”ги 132-сонли қарорда келтирилган.
Сифат назорати ва тезкор алоқани агентлик қошидаги “Ахборот технологиялари маркази” давлат муассасасининг колл-маркази таъминлайди. Дастур иштирокчиларининг рўйхати “Ягона миллий ижтимоий ҳимоя” ахборот тизимида шакллантирилади. Унда ўқувчилар ва уларнинг қонуний вакиллари ҳақидаги маълумотлар бўлади.
