Франциянинг собиқ президенти Николя Саркози сайлов кампаниясини хорижий молиялаштириш билан боғлиқ «Ливия иши» деб аталувчи иш бўйича 5 йилга озодликдан маҳрум этилганидан сўнг жазони ўташни бошлади. 2025 йил 21 октябрь куни эрталаб у Париждаги Санте қамоқхонасига етиб келди, дея хабар бермоқда Reuters. У Иккинчи жаҳон урушидан кейин қамоққа кирган Франциянинг биринчи собиқ президенти.
2025 йил сентябрь ойи охирида Париж суди Саркозини 2007 йилдаги президентлик кампаниясини Муаммар Каддафининг Ливия ҳукумати томонидан ноқонуний молиялаштириш иши бўйича тил бириктиришда айбдор деб топган эди.
Саркози Франция ички ишлар вазири бўлган пайтида, 2005 йилда Каддафий билан кампания учун маблағ олиш мақсадида, ўша пайтда яккаланиб қолган Ливия режимини халқаро майдонда қўллаб-қувватлаш эвазига келишув тузганликда айбланган.
Франциянинг собиқ президенти бутун суд жараёни давомида айбловларни рад этиб, бу иш сиёсий тусга эга эканлигини таъкидлаб келди.
Санте қамоқхонасига келиш йўлида Саркози Х (собиқ Twitter) ижтимоий тармоғида ўзини қасос ва нафрат қурбони бўлганини айтган пост эълон қилди. «Мен француз халқига ўзимга хос бўлган қатъий куч билан айтмоқчиманки, бугун эрталаб қамоққа Республиканинг собиқ президенти эмас, балки айбсиз одам киради», — деб ёзди.
Хавфсизлик нуқтаи назаридан, 70 ёшли Саркози бир кишилик камерада сақланади. Камераларнинг майдони 9 дан 12 кв.м.гача бўлиб, уларда душ мавжуд. Саркози телевизорга (ойлик 14 евро тўлов эвазига) ва стационар телефонга эга бўлади.
Саркози ўзи билан бирга қамоқдаги биринчи ҳафта учун 3 та китоб олиб кетишини айтди, улар орасида Александр Дюманинг ноҳақ қамоққа ташланган ва қасос режасини тузган одам ҳақидаги ҳикояси «Монте-Кристо графи» ҳам бор.
Саркозининг адвокатлари ҳукм устидан апелляция жараёни бошлангунга қадар уни муддатидан олдин озод қилиш тўғрисида илтимоснома киритдилар. Илтимоснома 2 ойгача кўриб чиқилиши мумкин.
Саркози ва унинг рафиқаси Карла Бруни билан илиқ муносабатда бўлган Франция Президенти Эммануэль Макрон 2025 йил 17 октябрь куни собиқ президентни Елисей саройида қабул қилди. «Бундай шароитларда мендан олдингилардан бирини қабул қилиш — инсонийлик даражасида — нормал ҳолат», — дея изоҳ берди у душанба куни танқидларга жавобан.
