«Ғофур Ғулом» метро бекатида туғилган чақалоқ ва унинг онасига умр бўйи метрода бепул юриш ҳуқуқини берувчи махсус карта берилади, дея хабар қилди Тошкент метрополитени матбуот хизмати.
«Бу совға метро ходимларининг фидойилиги ва инсонийлигини рамзий ифодалайди ва пойтахт метрополитени тарихида алоҳида ўрин эгаллайди», — дейилади идора хабарида.
Фавқулодда туғруқни қабул қилиб олган навбатчи Наима Маҳамаджонова бу воқеа қандай содир бўлганини сўзлаб берди.
«Навбатчилик пайтида ёнимга ички ишлар органи ходими келиб, бир аёлнинг тўлғоғи бошланганини айтди, ёрдам сўради. Биз дарҳол ўша ерга югурдик, тез ёрдамга қўнғироқ қилдик. ИИБ ходимлари аёлнинг оиласига хабар беришди», — деди.
«Ёнимда ҳамкасбларим бор эди, улар катта ёрдам кўрсатишди. Биз биргаликда ҳаракат қилдик. Масъулият ҳисси мени жуда қўрқитди. Ҳаяжон бор эди: «Қани энди ҳаммаси яхши ўтса, она ҳам, бола ҳам соғ қолса». Бизга биринчи ёрдам кўрсатишни ўргатишгани бежиз эмас экан», — дея эслайди бекат навбатчиси.
Янги туғилган чақалоқ қизча бўлиб чиқди. «У туғилганда териси кўкарган эди. Аввалига нафас олаётганини ҳис қилмадим. Биз унинг елкаларини енгил ишқаладик, онасининг кўкрагига ётқиздик. Кейин у кўзини озгина очди. Орқасига енгил урганимда йиғлай бошлади. Унинг овозини эшитиб, беҳад хурсанд бўлдим», — дея ўртоқлашди Наима Маҳамаджонова.
Бекат навбатчиси, шунингдек, ёрдам кўрсатишда иштирок этган бир қатор бошқа метро ходимларини рағбатлантириш режалаштирилган.
Эслатиб ўтамиз, шифокорлар етиб келгунга қадар (тахминан 10 дақиқа) бекат ходимлари она ва боланинг ҳолатини назорат қилиб, уларнинг хавфсизлигини таъминлаган. Кейинчалик аёл ва чақалоқни шифокорлар касалхонага олиб боришган.
