2025 йил 24 апрель куни Тошкент шаҳрида Марказий Осиё давлатларининг махсус хизматлари раҳбарлари илк бор учрашди. Бу ҳақида Ўзбекистон Давлат хавфсизлик хизмати матбуот хизмати хабар берди.
Президент Шавкат Мирзиёев иштирокчиларга йўллаган мурожаатида минтақадаги махсус хизматлар раҳбарлари ўртасидаги мулоқот умумий ёндашувлар ва минтақавий хавфсизликни таъминлаш бўйича самарали механизмларни ишлаб чиқишга хизмат қилишини таъкидлади.
Учрашувда махсус хизматлар раҳбарлари замонавий таҳдид ва хатарларни баҳолашда ягона ёндашувларни ишлаб чиқиш ҳамда уларни бартараф этиш бўйича ўзаро ҳамкорлик самарадорлигини ошириш масалаларини муҳокама қилди.
Шунингдек, минтақавий хавфсизлик, терроризм ва экстремизм, ноқонуний наркотик ва қурол айирбошига, трансмиллий жиноятчиликка қарши кураш, ахборот ва киберхавфсизликни таъминлаш масалалари ҳамда бошқа ҳамкорлик йўналишлари кўриб чиқилди.
