Давлат активларини бошқариш агентлиги ижтимоий тармоқларда тарқалаётган Матбуотчилар кўчасида жойлашган «Матбуот уйи» («Газеталар корпуси») мажмуаси хусусий инвесторга берилгани тўғрисидаги хабарларни рад этди.
Telegram’даги Platforma.uz канали манбага таяниб, ушбу бино тадбиркорга берилгани ва у журналистларга тегишли эмаслигини маълум қилган эди.
Давлат активларини бошқариш агентлигининг маълумотига кўра, ушбу хабарлар ҳақиқатга тўғри келмайди ва фақат тахминларга асосланган. Президент қарорига мувофиқ, бино ва унга туташ иншоотлар Ўзбекистон Миллий ахборот агентлигига (ЎзА) оператив бошқарув ҳуқуқи асосида берилган.
Бир йилдан ортиқ вақтдан бери реконструкция қилинаётган ушбу объект негизида медиашаҳарча барпо этилиши режалаштирилган.
«Ҳозирги вақтда бинони демонтаж қилиш ишлари якунланди, қурилиш ва монтаж ишларини бошлаш учун лойиҳа-смета ҳужжатлари тайёрланган. Шуни алоҳида таъкидлаш лозимки, “Матбуот уйи” бинолари ва иншоотларини сотиш режалаштирилмаган, ЎзА эса унинг ягона балансда тутиб турувчиси бўлиб қолади», — дейилади хабарда.
Агентликка кўра, қурилиш ишлари якунлангач, бинода мамлакатдаги барча босма оммавий ахборот воситаларининг таҳририятлари жойлашади.
Қурилиш ва уй-жой коммунал хўжалиги вазирлигининг маълум қилишича, ҳозиргача бинодаги бетон-панелли элементлар демонтаж қилинган, фақат бино каркаси қолдирилган.
«Келгусида бинога энергия тежовчи ва замонавий технологиялар ўрнатилиши, қулай шарт-шароитлар яратилиши ҳамда бинога замонавий кўриниш берилгани режалаштирилган», — дейилади хабарда.
«Газеталар корпуси» 2018 йил баҳорида аукционга қўйилган эди. Ўшанда объектнинг бошланғич нархи 18,7 млрд сўмни ташкил этган. Кейинчалик у аукциондан олиб ташланган.
2021 йил август ойида Бухоро ва Нуронийлар кўчалари кесишмасида жойлашган (18,1 минг кв.м.) ушбу бино давлат активларини хусусийлаштириш доирасида оммавий савдоларга қўйилган 12 та актив рўйхатига киритилган эди. Объект савдодан олиб ташланиб, ОАВ, жумладан босма нашрлар ихтиёрида қолдирилган. Кейинчалик бинога ЎзА балансда тутиб турувчи этиб белгиланган.
2023 йил ноябр ойида Қурилиш ва уй-жой коммунал хўжалиги вазирлиги «Матбуот уйи» мажмуасини реконструкция қилиш ҳамда унда ва унга туташ ҳудудларда медиашаҳарча барпо этиш бўйича тендер натижаларини эълон қилган. Тендерда 98,8 млрд сўмлик таклиф билан Yangi Zamon Bino компанияси ғолиб бўлган.
