Ўзбекистонда давлат хизматчилари даромадларини декларация қилиш тўғрисидаги қонунни қабул қилиш вақти келди. Бу ҳақида 2025 йил 5 март куни Коррупцияга қарши курашиш миллий кенгашининг кенгайтирилган йиғилишида президент Шавкат Мирзиёев маълум қилди.
Унинг сўзларига кўра, бу масалада жамоатчилик фикри жуда муҳим.
Президент тегишли идораларга қонун лойиҳасини тез фурсатда жамоатчилик муҳокамасига қўйиш ва уни 1 апрелгача кўриб чиқиш учун киритишни топширди.
Шунингдек, давлат раҳбари ноқонуний бойлик орттириш учун жавобгарликни белгилаш зарурлигини таъкидлади.
Шавкат Мирзиёев қонунчиликка ноқонуний бойлик орттириш тўғрисида модда киритишни таклиф қилди. Яъни, давлат хизматчиси расмий декларация қилинган даромадларига мос келмайдиган мулкининг келиб чиқишини исботлаши шарт бўлади.
Президент Миллий кенгаш ва парламентнинг коррупцияга қарши курашиш бўйича қўмиталарига бу йўналишда халқаро стандартларга мос таклифларни ишлаб чиқишни тавсия этди.
Эслатиб ўтамиз, 2021 йил февраль ойида Жиноят кодексининг янги таҳририда коррупциявий жиноятлар учун жавобгарликни кучайтириш режалаштирилган эди. Хусусан, давлат хизматчиларининг ноқонуний бойлик орттириши ҳақидаги модда ва номоддий манфаатлар бўйича нормалар киритилиши керак эди, бироқ янги кодекс ҳали қабул қилингани йўқ.
Шунингдек, президент фармонига кўра, 2022 йил 1 январдан бошлаб давлат хизматчилари, уларнинг турмуш ўртоқлари ва вояга етмаган фарзандларининг даромадлари ва мулкини декларация қилиш тизими жорий этилиши керак эди.
Бу қонун лойиҳаси 2021 йил 13 ноябрда Вазирлар Маҳкамасига киритилган. Бироқ ҳукумат ҳалигача ҳужжатни Олий Мажлис Қонунчилик палатасига тақдим этмаган, деб таъкидлаган эди Коррупцияга қарши курашиш агентлиги.
2024 йилда агентлик раҳбари Акмал Бурхонов «Газета.uz»га берган маълумотга кўра, даромадларни декларация қилиш бўйича қонун лойиҳаси деярли тайёр – у вазирлик ва идоралар билан келишилган ҳамда Адлия вазирлигининг экспертизасидан ўтган.
