Россиянинг йирик нефть компанияларидан бири бўлган «Лукойл» ўзининг хорижий активларини Gunvor Group’га сотиш бўйича дастлабки келишувга эришди. Бу ҳақда компания ўз сайтида хабар берди.
«Лукойл» гуруҳнинг хорижий активларига эгалик қилувчи юз фоизлик тўлиқ бўйсунувчи тузилма бўлган LUKOIL International GmbH компаниясини сотиб олиш таклифини олди.
Хабарда қайд этилишича, битимнинг асосий шартлари томонлар томонидан келишиб олинган ва «Лукойл» Gunvor’нинг таклифини қабул қилиб, бошқа потенциал харидорлар билан музокаралар олиб бормаслик мажбуриятини ўз зиммасига олди.
Якуний сотиб олиш шартномасини тузиш бир қатор тўхтатувчи шартларнинг бажарилишига боғлиқ, жумладан, Gunvor АҚШ Молия вазирлигининг Хорижий активларни назорат қилиш бошқармаси (OFAC) рухсатномасини олиши, шунингдек, зарур бўлса, хорижий юрисдикциялардаги бошқа лицензиялар ва келишувларни олиши шарт.
Зарур бўлса, томонлар битим якунлангунига қадар халқаро активлар ва уларнинг банк хизматларини узлуксиз ишлашини таъминлаш учун амалдаги OFAC лицензияси ва бошқа рухсатномаларни узайтириш учун мурожаат қилишни режалаштирмоқда.
Компания бундай сотув LUKOIL International’нинг «бир қатор давлатлар томонидан «Лукойл» ва унинг бўйсунувчи компанияларига қарши чеклов чоралари жорий этилиши» билан боғлиқлигини таъкидлади.
2025 йил 22 октябрь куни АҚШ Молия вазирлигининг Хорижий активларни назорат қилиш бошқармаси (OFAC) «Лукойл»ни санкциялар рўйхатига киритиб, блокировка қилувчи чекловларни қўйди. Санкциялар компания ва унинг улуши 50%дан ортиқ бўлган бўйсунувчи тузилмалари билан операцияларни тугатиш учун бир ойлик муддат (2025 йил 21 ноябргача) белгилайди.
2025 йил 21 ноябрдан кейин АҚШ фуқаролари ёки молия институтларига ушбу компаниялар ва уларнинг билан боғлиқ компанияларга ёрдам бериш тақиқланади, акс ҳолда ҳаммаси санкцияларга дуч келади.
2025 йил 27 октябрда «Лукойл» ўзининг хорижий активларини сотишини эълон қилди.
Россия Forbes маълумотларига кўра, Россиянинг энг йирик хусусий нефть компанияси бўлган «Лукойл»нинг асосий акциядори миллиардер Вагит Алекперовдир (Forbes’нинг 2025 йилги рус миллиардерлари рейтингида 1-ўрин, бойлиги — 28,7 млрд доллар). Алекперов 2022 йил апрелида компания президенти лавозимини тарк этган — бу Буюк Британия томонидан унга қарши санкциялар жорий этилганидан бир неча кун ўтганидан сўнг бўлди.
Gunvor — Швейцарияда жойлашган, 2000 йилда ташкил этилган дунёдаги энг йирик энергетика трейдерларидан бири. Уни тузишда Россиялик бизнесмен Геннадий Тимченко (Forbes рейтингида 6-ўрин, бойлиги — 23,2 млрд доллар) иштирок этган бўлиб, у РФ Президенти Владимир Путинга энг яқин бизнесменлардан бири ҳисобланади. 2014 йил март ойида Тимченко санкциялар таҳдиди фонида Gunvor’даги 44% акцияларини ўзининг ҳамкори Торбйорн Торнквистга сотган.
«Лукойл» Ўзбекистоннинг ёқилғи-энергетика секторидаги энг йирик хорижий инвесторларидан бири ҳисобланади. Компаниянинг 2024 йилдаги жами инвестициялари ҳажми 10 миллиард доллардан ошган.
«Лукойл»нинг қўшма лойиҳалардаги давлат ҳамкори бўлган «Ўзбекнефтгаз» компанияси раиси Баҳодир Сидиқов аввалроқ баёнот бериб, томонлар америка санкцияларининг мумкин бўлган таъсирини муҳокама қилишаётганини маълум қилган эди.
Ўзбекистон ҳукумати Россия компанияси активларини сотиб олишни кўриб чиқмоқдами, деган саволга у бир ой ичида активларни сотиб олиш бўйича келишиш «амалда имконсиз» эканини билдирган эди.
