Жанубий Корея президенти Юн Сок Ёл, собиқ мудофаа вазири ва ички ишлар вазири давлатга хиёнатда айбланмоқда. Бундай айбловлар 3 декабрь куни мамлакатда ҳарбий ҳолат эълон қилинганидан сўнг илгари сурилди. Yonhap агентлиги хабарига кўра, Жанубий Корея полицияси президентга қарши тергов ишларини бошлади.
Мазкур иш бўйича икки ариза тушган: бири мухолифатдаги Кореяни қайта тиклаш партиясидан, иккинчиси эса 59 фаолдан иборат гуруҳдан.
Шикоятларда президент Юн Сок Ёл билан бир қаторда собиқ мудофаа вазири Ким Ён Хён, армия бош штаби генерали Пак Ан Су ва ички ишлар вазири Ли Сан Миннинг ҳам исмлари кўрсатилган.
Шунингдек, собиқ мудофаа вазири Ким Ён Хён тергов давомида мамлакатдан чиқиб кетиш тақиқланган шахслар рўйхатига киритилди. Бир неча кун олдин у ўз лавозимидан истеъфо бериб, ҳарбий ҳолат жорий этилиши билан боғлиқ барча воқеалар учун масъулиятни ўз зиммасига олганини эълон қилди. Маҳаллий ОАВ маълумотларига кўра, айнан у президентга ҳарбий ҳолат эълон қилишни таклиф қилган.
3 декабрь куни кечқурун Юн Сок Ёл мамлакатда ҳарбий ҳолат жорий этиш ҳақида қарор қабул қилди. У бу қадамни “коммунистик кучлардан конституцион тартибни ҳимоя қилиш” учун зарур деб тушунтирди. Президентнинг сўзларига кўра, мухолифат мамлакатни инқирозга олиб келмоқчи бўлаётгани сабабли бундай чора кўрилган.
Бироқ, парламент депутатлари президентнинг қарорини танқид қилиб, уни бекор қилиш учун овоз берди. Шундан сўнг Юн Сок Ёл ўз фармонини қайтариб олди.
4 декабрь куни мухолифатдаги партиялар Юн Сок Ёлга нисбатан импичмент талабини парламентга тақдим қилди. Ушбу масала бўйича овоз бериш жума ёки шанба куни (2024 йил 7 ёки 8 декабрь кунлари) ўтказилиши кутилмоқда. Импичмент учун парламентдаги 300 депутатдан учдан икки қисмининг овози керак бўлади.
