Конор Макгрегор шу йилнинг охирида бўлиб ўтадиган сайловларда Ирландия президентлигига ўз номзодини қўйишини эълон қилди. Жанжалкаш собиқ жангчи бу лавозимнинг асосан маросимий аҳамиятга эга эканига қарамай, ўз кампаниясини иммигрантларга қарши нуқтаи назаридан олиб боришини маълум қилди.
Сўнгги йилларда Ирландияда ўнг қанот гуруҳларининг етакчиларидан бирига айланган Макгрегор ижтимоий тармоқларда Европа Иттифоқининг бошпана аризаларини барқарор тақсимлашга қаратилган янги миграция келишувига қарши чиқишини маълум қилди.
«Бу қонунга қарши ҳукуматга ким қарши тура олади?» – деб ёзди у Instagram’даги 46 миллиондан ортиқ кузатувчиларига. «Улар таклиф қиладиган ҳар қандай президентлик номзоди ҳеч қандай қаршилик кўрсата олмайди. Мен эса курашаман!»
Бу баёнот Сен-Патрик кунида, 17 март куни Макгрегор АҚШ президенти Дональд Трамп билан Оқ уйда кўришганидан бир неча кун ўтиб берилди. У шу тариқа АҚШ раҳбарига яқин бўлган Европа сиёсатчилари қаторида анти-иммиграция позициясини тарғиб қилди. Бу эса Ирландияда кескин танқидларга сабаб бўлди.
«Ирландия ўз ирландиялигини йўқотиш ёқасига келиб қолди», – деди Макгрегор 2025 йил 17 март куни, ҳукуматни «ирланд халқи овозини эътиборсиз қолдириш»да айблаб. Унинг сўзларига кўра, қишлоқ шаҳарлар иммигрантлар томонидан эгаллаб олинмоқда”.
Ирландия раҳбари Михол Мартин Макгрегорнинг баёнотлари «Сен-Патрик куни руҳини ва Ирландия халқи қарашларини акс эттирмайди» – деб таъкидлади.
Бир вақтлар Ultimate Fighting Championship’нинг (UFC) юзи бўлган Дублинлик Макгрегор иккита UFC чемпионлик камарини бир вақтнинг ўзида қўлга киритган илк жангчи бўлган. Forbes маълумотларига кўра, у 2021 йилда дунёдаги энг кўп даромад топган спортчи бўлган.
Бир неча бор қайтиш ҳақида миш-мишлар тарқалганига қарамай, у UFC’да тўрт йилдан бери жанг қилмади ва Ирландияда энг баҳсли шахслардан бирига айланди. У бир неча марта жинсий зўравонлик айбловлари билан тўқнаш келди, аммо уларни рад этди.
2025 йил январь ойида Майамидаги NBA финалида бир аёл 2023 йилда Макгрегорни жинсий зўравонликда айблади. Ўша пайтда полиция текширув ўтказган ва Майами-Дейд прокуратураси унга қарши айблов қўйишдан бош тортган. Макгрегор айбловларни ёлғон деб атади.
2024 кузида эса Дублиндаги фуқаролик суди 2018 йилда бир аёлни «шафқатсиз зўрлаш ва калтаклаш» бўйича 250 000 евро (257 000 доллар) миқдорида товон пули тўлашга ҳукм қилди. Макгрегор судда улар ўзаро розилик асосида жинсий алоқада бўлганини айтди ва қарорга қарши шикоят киритишини маълум қилди.
Сўнгги йилларда Макгрегор ижтимоий тармоқларда инсонлар билан баҳслашишга ҳам кўпроқ эътибор қарата бошлади. Сиёсий таҳлилчилар ва ўнг қанот ҳаракатлари бўйича мутахассислар CNN’га маълум қилишича, Макгрегорнинг ирланд патриотизми, уни спортчи сифатида машҳур қилган хусусият, эндиликда «ўнг радикал» ирланд миллатпарварлигига айланиб бормоқда.
Макгрегор 2022 йилдаёқ иммиграцияга қарши намойишларда қатнашган инсонларни қўллаб-қувватлаган эди. Айрим ирланд сиёсатчилари уни мамлакат иммиграция сиёсати бўйича онлайн нафратни авж олдиришда айблашди. Бу масала Ирландия учун айниқса нозик бўлиб, мамлакат ўзининг узоқ йиллик муҳожирлик тарихи билан танилган.
Ирландия аҳолиси 5 миллиондан сал ортиқ бўлишига қарамай, мамлакатга 2023 йил апрелигача бўлган бир йил ичида 141 600 иммигрант келган. Бу 16 йил ичидаги энг юқори кўрсаткич бўлиб, марказий статистика идорасига кўра, бунинг сабаби Ирландия иқтисодиётининг барқарор ўсишидир.
Бироқ, кўплаб оддий ишчилар бу ўсишдан манфаат кўра олмаяпти. Улар юқори уй-жой нархлари ва ижара ҳақини тўлашда қийинчиликларга дуч келмоқда.
Ирландиядаги навбатдаги президентлик сайлови 11 ноябргача бўлиб ўтиши керак.
2025 йил 20 март куни ўз Instagram постида Макгрегор агар президент этиб сайланса, Европа Иттифоқининг миграция тўғрисидаги қонуни бўйича референдум ўтказишини маълум қилди.
«Мен бу келишувга қатъий қарши бўлсам-да, бу масала менинг ёки ҳукуматнинг қарори эмас. Бу – ирланд халқининг қарори! Ҳар доим!» – деб ёзди у.
«Мен президент бўлган тақдирда Ирландиянинг келажаги шундай бўлади».
Бироқ, Макгрегор учун сайлов бюллетенига номини киритишнинг ўзи катта муаммо бўлиши мумкин. Чунки Ирландия парламентида унинг кескин анти-иммиграция қарашларини қўллаб-қувватловчи депутатлар жуда кам. Жамоатчилик эса ўтган ноябрдаги суд ишидан кейин уни кескин танқид қилган.
Ирландия қонунчилигига кўра, президентликка номзод бўлиш учун парламентнинг 234 аъзосидан камида 20 нафари ёки мамлакатдаги 31 маҳаллий кенгашдан тўрттаси номзодни тасдиқлаши керак.
