Жиноят ишлари бўйича Оҳангарон шаҳар суди 2025 йил 25 декабрь куни бўлиб ўтган ёпиқ мажлисда манзил-колониянинг 31 ёшли маҳкумига нисбатан ҳукм чиқарди. Ушбу шахс 2025 йил 16 октябрь куни маҳаллий корхоналардан бирида ишлаётган вақтида яшириниб, 9 ёшли қизни зўрлаган эди.
Ўзбекистон Олий суди матбуот хизмати хабарига кўра, Миржалол Туронов Жиноят кодексининг 119-моддаси 4-қисмида (14 ёшга тўлмаган шахсга нисбатан жинсий эҳтиёжни зўрлик ишлатиб, ғайритабиий шаклда қондириш) назарда тутилган жиноятни содир этганликда айбдор деб топилди ва 18 йил муддатга озодликдан маҳрум этилди.
Бундан ташқари, Жиноят кодексининг 34-моддаси 3-қисми «а» бандига (жиноятлар рецидиви) асосан, М. Т. ўта хавфли рецидивист деб топилди. У жазонинг дастлабки икки йилини турмада, қолган қисмини эса ўта қаттиқ тартибли колонияда ўтайди.
Маҳкум қандай қилиб манзил-колонияга тушиб қолган?
Туронов 2017 йил ноябрь ойида вояга етмаган шахсни зўрлаганидан кейин қўлга олингани ва 2018 йилда умумий тартибли колонияда 16 йилга озодликдан маҳрум этилгани ҳақида хабар берилган эди.
2024 йил август ойида жиноят ишлари бўйича Нишон туман суди маҳкумни манзил-колонияга ўтказиш тўғрисида қарор чиқарган. Бунда Жиноят-ижроия кодексининг 113-моддаси қўлланилган бўлиб, унга кўра тузалиш йўлига ўтган ва жазо муддатининг камида учдан бир қисмини ўтаган маҳкумларни манзил-колонияга ўтказишга йўл қўйилади.
Олий судда оғир жиноят учун ҳукм қилинган шахс қандай қилиб манзил-колонияга ўтказилгани ҳақидаги саволга, ўша пайтда қарор қонунчиликнинг эски таҳрири доирасида қабул қилингани билан жавоб берилган эди.
Зўравонликка қарши Nemolchi.uz лойиҳаси асосчиси Ирина Матвиенко Ўзбекистонда судлар Жиноят-ижроия кодексидан жазони енгиллаштириш учун «ҳуқуқий лазейка» (тирқиш) сифатида фойдаланиши мумкинлиги ҳақида фикр билдирган эди, ваҳоланки ушбу ҳужжат бевосита улар учун мўлжалланмаган.
